भारतीय सेनाले डोङ्क्या ला हुँदै लाचेनबाट पर्यटकहरूको निकासी कार्य शुरु गऱ्यो

मङ्गन, 08 अप्रेल । भारतीय सेना र बीआरओको निरन्तर प्रयास अनि जिल्ला प्रशासन र जिल्ला आपदा प्रबन्धन प्राधिकरणसँगको समन्वयमा लाचेनमा रहेका पर्यटकहरूलाई लाचेनबाट डोङ्क्या ला-शिव मन्दिर-जिरो पोइन्ट-युमथाङ र लाचुङ मार्ग हुँदै सुरक्षित रूपमा निकाल्ने कार्य शुरु गरिएको छ। चुनौतीपूर्ण भूभागमा सहज मार्ग सुनिश्चित गर्न लाचेनबाट पर्यटकहरूको निकासी आज बिहान समन्वित तरिकाले समूहहरूमा शुरु गरिएको ​मङ्गन जिल्ला प्रशासनले बताएको छ।
यस कार्यमा लाचेन जुम्सा, औषधीय वनस्पति बोर्डका अध्यक्ष, पर्यटन तथा नागरिक उड्डयन विभागका अध्यक्ष, पर्यटन विभागका अधिकारीहरू, लाचेन युवा विकास समिति, लाचेनका चालकहरू, टास, लाचेन होटल संघ र लाचेनका जनताले समन्वित प्रयास गरेका थिए। जिल्लापाल अनन्त जैन, पुलिस अधीक्षक एलबी छेत्री, एसडीएम चुङथाङ अरुण छेत्री र एसडीपीओ चुङथाङ चन्दन छेत्री निकासी प्रक्रियाको निरीक्षण गर्न घटनास्थलमा उपस्थित थिए।
दुई दिनभन्दा बढी समयदेखि चलिरहेको चुनौतीपूर्ण प्रयासले लाचेनका मानिसहरूको शक्ति, लचिलोपन र सामुदायिक भावनालाई फेरि एक पटक उजागर गरेको छ। लाचेन जुम्सा, जिल्ला प्रशासन, सेना, बीआरओ र पर्यटन सरोकारवालाहरूको तत्काल प्रतिक्रियालाई पर्यटकहरू र विगत केही दिनदेखि स्थितिलाई नजिकबाट अनुगमन गरिरहेका मानिसहरूले सराहना गरेका छन्।