जोरथाङमा वृद्ध व्यक्तिको हत्या, आरोपीले गरे पुलिस थानामा आत्मसमर्पण

गान्तोक, 10 अप्रेल। जोरथाङमा एक 62 वर्षीय वृद्धको हत्या भएको घटना प्रकाशमा आएको छ। यस घटनाको सम्बन्धमा पुलिसले आरोपी व्यक्तिलाई पक्राउ गरेको छ। आरोपी व्यक्ति स्वयं पुलिस थानामा उपस्थित भएर आफ्नो अपराध स्वीकार गर्दै आत्मसमर्पण गरेको बताइएको छ।
पुलिस रिपोर्टका अनुसार, 9 अप्रेल, 2026 का दिन जोरथाङ पुलिस थानामा पीडित परिवारले 62 वर्षीय पिता गत 5 अप्रेलदेखि बेपत्ता बनेको सम्बन्धमा प्राथमिकी दर्ता गराए। प्राथमिकीको आधारमा एएसआई दाउछे भोटियाको अगुवाईमा छानबिन शुरू गरियो। यस क्रममा माझीगाउॅं, जोरथाङ बजार निवासी एक 32 वर्षीय व्यक्ति थानामा उपस्थित भए र स्वेच्छापूर्वक आत्मसमर्पण गरे।
उनले साक्षीहरूको उपस्थितिमा आफ्नो अपराध स्वीकार गर्दै उक्त 62 वर्षीय वृद्धको हत्या गरेको खुलासा गरे। आरोपी व्यक्तिले स्वीकार गर्दै बताएअनुसार, 5 अप्रेलका दिन दिउॅंसो लगभग 12:30 बजी उनी जोरथाङको गरीब उत्थान भवन नजिक माउण्ट डिस्टिलेरिज वेयरहाउसमा थिए। त्यहॉं वृद्ध व्यक्ति पनि आइपुगे र पैसा भुक्तानीलाई लिएर दुईबीच भनावैरी शुरू भयो।
यस क्रममा उनले वृद्धलाई धकेल्दा उनी भुॅंइमा लडे र उनको खून निस्किन थाल्यो। यसपछि, उनले सेतो नाइलनको डोरी वृद्धको घॉंटीमा बेरेर हत्या गरे। आरोपीको स्वीकारोक्ति भिडियो रेकर्ड गरिएको बताइएको छ। यसपछि, पुलिसले आरोपी व्यक्तिको बयानको आधारमा वेयरहाउसमा गएर हेर्दा वृद्धको शव बरामद गऱ्यो, जुन आंशिक रूपमा कुहिएको थियो। पुलिसले हत्यामा प्रयोग गरिएको नाइलनको डोरी पनि फेला पारेको छ।
आरोपी व्यक्ति विरुद्ध बीएनएस 2023 को धारा 103(1) अन्तर्गत मामिला दर्ता गरिएको छ। घटनाको सम्बन्धमा पुलिसले कानुनी करबाही शुरू गरेको बताइएको छ।