गान्तोक, 26 मई । भारतकी राष्ट्रपति द्रौपदी मुर्मू सिक्किमको तीन दिवसीय औपचारिक भ्रमणका लागि मंगलवार गान्तोक आइपुगिन्। उनी आगामी 28 मईसम्म सिक्किम भ्रमणमा रहनेछन् भने यसावधि विभिन्न कार्यक्रमहरूमा सहभागी हुनेछन्।
राष्ट्रपति मुर्मू सिक्किमको तीन दिवसीय औपचारिक भ्रमणमा आज गान्तोक आइपुगिन्। उनी भारतीय सेनाको हेलिकप्टरमा बागडोगराबाट राजधानीको लिबिङस्थित हेलीप्याडमा अवतरण गरिन्। हेलिप्याडमा राष्ट्रपतिलाई सिक्किमका राज्यपाल ओमप्रकाश माथुर, मुख्यमन्त्री प्रेमसिंह तामाङ, विधानसभाका अध्यक्ष एमएन शेर्पा र उपाध्यक्ष राजकुमारी थापा, मन्त्रीगण, सांसद सदस्यहरू, मुख्य सचिव, पुलिस महानिदेशक, भारतीय सेनाका प्रतिनिधिहरू आदिले स्वागत जनाए। हेलीप्याडबाट उनी राजधानीको लोकभवन प्रस्थान गरिन्।
सरकारी विज्ञप्तिका अनुसार, राष्ट्रपति मुर्मूले सिक्किम भ्रमणको पहिलो दिन आज राजधानीमा पिङ्क सिटी रनर बसहरूलाई झण्डा हल्लाएर शुभारम्भ गर्नेछन्। यो सिटी रनर राज्य सरकारले विशेषगरी महिलाहरूका लागि शुरू गरिरहेको छ भने यसमा महिलाहरूले नि:शुल्क रूपमा यात्रा गर्न सक्नेछन्।
यसपछि, उनले रिज पार्कमा अर्केडियमको भ्रमण गर्नेछन्। उक्त अर्केडियमको उद्घाटन गत वर्ष देशका प्रधानमन्त्री नरेन्द्र मोदीले भर्चुअल माध्यमद्वारा गरेका थिए। हालैमा आफ्नो सिक्किम भ्रमणको क्रममा प्रधानमन्त्रीले उक्त अर्केडियमको भ्रमण गरे भने अर्केडियमको प्रशंसा पनि गरेका थिए। आज सॉंझ राष्ट्रपति देवरालीस्थित नामग्याल इन्स्टिच्युट अफ टिबेटोलोजीको भ्रमण गर्नेछन्।
दोस्रो दिन, 27 मई बिहान 9 बजी उनी भारती-चीन सीमा क्षेत्र नथुला पास भ्रमणमा जानेछन्। सोही दिन दिउँसो उनी सिक्किम विश्वविद्यालयको सातौँ दीक्षान्त समारोहमा सहभागी हुनेछन्।
यसरी नै आफ्नो भ्रमणको अन्तिम दिन 28 मईमा राष्ट्रपतिले राजधानीको पाल्जोर स्टेडियममा आयोजना हुने अलङ्करण समारोहमा भारतका राष्ट्रपतिको ‘पुलिस कलर’ सिक्किम पुलिसलाई प्रदान गर्नेछ। यो पुरस्कार सिक्किम पुलिसलाई देशमा उत्कृष्ठ सेवा कार्यहरूका लागि प्रदान गरिने छ। यो पुरस्कार प्राप्त गर्ने सिक्किम देशकै 15औं राज्य हो।
