गान्तोक जिल्लामा एसआईआर २०२६ को लागि गणना फारम वितरण कार्य शुरु

गान्तोक, 30 मई । भारत निर्वाचन आयोगद्वारा मतदाता नामावलीलाई स्वच्छ, शुद्ध तथा अद्यावधिक बनाउने उद्देश्यले सञ्चालन गरिएको विशेष गहन पुनरीक्षण (एसआईआर) 2026 कार्यक्रमअन्तर्गत गान्तोक जिल्लामा आजदेखि घरदैलो गणना फारम वितरण तथा संकलन कार्य शुरु भएको छ। गान्तोक जिल्लामा आठ वटा विधानसभा निर्वाचन क्षेत्र तथा एक सङ्घ सिट रहेका छन्।यस अभियानअन्तर्गत बुथ लेभल अफिसर (बीएलओ) हरूले विभिन्न मतदान केन्द्र क्षेत्रहरूमा घरदैलो भ्रमण गरी फारम वितरण तथा संकलन गरिरहेका छन्। पुनरीक्षण अभियानअन्तर्गत सबै निर्वाचन क्षेत्रमा घरदैलो फारम वितरण तथा संकलन कार्य सञ्चालन भइरहेको छ।घरदैलो अभियान २८ जून, २०२६ सम्म जारी रहनेछ। बीएलओहरूले प्रत्येक घरधुरीमा पुगेर गणना फारम वितरण गर्नुका साथै मतदाताहरूलाई आफ्नो निर्वाचनसम्बन्धी विवरण जाँच तथा अद्यावधिक गर्न सहयोग गर्नेछन्।मतदाताहरूलाई फाराम बुझाउनुअघि आफ्नो नाम, उमेर, ठेगाना, फोटो, ईपीआईसी नम्बर तथा पारिवारिक विवरण सावधानीपूर्वक जाँच गर्न अनुरोध गरिएको छ।विशेष गहन पुनरीक्षण कार्यक्रमको मुख्य उद्देश्य योग्य सबै नागरिकलाई मतदाता नामावलीमा समावेश गर्नु, मृत्यु भएका, बसाइँ सरेका वा दोहोरो रूपमा नाम दर्ता भएका मतदाताहरूको नाम हटाउनु, मतदाता विवरणमा भएका त्रुटिहरू सच्याउनु तथा मतदाता नामावलीको शुद्धता र पारदर्शिता कायम राख्नु हो।मतदाताहरूलाई घरदैलो प्रमाणीकरण प्रक्रियामा बीएलओहरूसँग पूर्ण सहयोग गर्न तथा तोकिएको समयसीमाभित्र आफ्नो गणना फारम बुझाउन अनुरोध गरिएको छ। सहयोगका लागि मतदाताहरूले आफ्नो सम्बन्धित बीएलओ, निर्वाचन दर्ता अधिकारी वा सहायक निर्वाचन दर्ता अधिकारीको कार्यालयमा सम्पर्क गर्न सक्नेछन्। साथै, मोटर हेल्पलाइन एप प्रयोग गर्न वा १९५० हेल्पलाइन नम्बरमा फोन गर्न सकिने बताइएको छ।पारदर्शिता र जनसहभागिता बढाउन विभिन्न राजनीतिक दलहरूले आफ्ना बुथ लेभल एजेन्टमार्फत पनि यस अभियानमा सहभागिता जनाइरहेको बताइएको छ। गान्तोकका जिल्ला निर्वाचन अधिकारीले सबै योग्य मतदाताहरूलाई घरदैलो प्रमाणीकरण प्रक्रियामा बीएलओहरूसँग सहयोग गरी सही तथा अद्यावधिक मतदाता नामावली तयार पार्न योगदान पुर्याउन आग्रह गरेका छन्।