स्वतन्त्रता दिवस २०२६ को तयारीबारे मुख्य सचिवद्वारा समीक्षा बैठक

गान्तोक, 07 अगस्त। सिक्किम सरकारका मुख्य सचिव आर. तेलाङले आज टाशीलिङ सचिवालयको सम्मेलन कक्षमा स्वतन्त्रता दिवस २०२६ को तयारीको समीक्षा गर्न बैठकको अध्यक्षता गरेका छन्। बैठकमा विभिन्न विभागका प्रमुखहरू, भारतीय सेना र अर्धसैनिक बलका अधिकारीहरूको उपस्थिति रहेको थियो।बैठकका क्रममा मुख्य सचिवले स्वतन्त्रता दिवस समारोहको प्रस्तावित कार्यक्रम तालिकाको समीक्षा गर्दै स्वीकृत कार्यक्रमअनुसार सबै गतिविधि सञ्चालन गर्न निर्देशन दिए। उनले सम्बन्धित सबै विभागलाई आपसी समन्वय कायम राख्दै तोकिएको समयभित्र सम्पूर्ण तयारी पूरा गर्न आग्रह गरे।मुख्य सचिवले आगामी १४ अगस्त (शुक्रबार) आयोजना हुने तिरङ्गा यात्रा को तयारीबारे पनि समीक्षा गरे। एमजी मार्गदेखि मानन केन्द्रसम्म आयोजना हुने उक्त यात्रालाई व्यवस्थित र सफल बनाउन सम्बन्धित विभागहरूलाई आवश्यक सबै तयारी र प्रभावकारी समन्वय सुनिश्चित गर्न निर्देशन दिए।बैठकमा स्थानीय कलाकारहरूको सहभागितासहितका सांस्कृतिक कार्यक्रमहरूको तयारीबारे पनि छलफल भएको थियो। मुख्य सचिवले कलाकार, आयोजक तथा सम्बन्धित निकायबीच प्रभावकारी समन्वय कायम गर्न सम्बन्धित विभागलाई निर्देशन दिए।विभागीय प्रमुखहरूले पनि आफ्नो-आफ्नो विभागलाई जिम्मेवारी दिइएका कार्यहरूको प्रगति विवरण मुख्य सचिवसमक्ष प्रस्तुत गरेका थिए।बैठकको अन्त्यमा मुख्य सचिवले स्वतन्त्रता दिवस २०२६ लाई सफलतापूर्वक सम्पन्न गर्न सबै विभागले आपसी समन्वय कायम राख्दै तोकिएको समयसीमाभित्र जिम्मेवारी पूरा गर्न निर्देशन दिए।