नेपालमा बाढीबाट भएको क्षतिप्रति मुख्यमन्त्री तामाङद्वारा दुःख व्यक्त

गान्तोक, 26 अगस्त। सिक्किमका मुख्यमन्त्री प्रेमसिंह तामाङले नेपालमा आएको बाढीबाट भएको ठूलो जनधनको क्षतिप्रति गहिरो दुःख व्यक्त गरेका छन्। उनले बुधबार सामाजिक सञ्जाल फेसबुकमार्फत नेपालमा भएको प्राकृतिक विपत्तिप्रति दुःख व्यक्त गर्दै प्रभावित परिवारप्रति समवेदना प्रकट गरेका हुन्।मुख्यमन्त्री तामाङले हाम्रो छिमेकी राष्ट्र नेपालका विभिन्न क्षेत्रमा अविरल तथा भारी वर्षाका कारण आएको बाढी, पैह्रो तथा प्राकृतिक विपत्तिबाट भएको ठूलो जनधनको क्षतिको दुःखद् समाचारले अत्यन्त मर्माहत साथै निस्तब्ध बनाएको बताएका छन्।उनले विशेषगरी नेपालको भोटेकोसी नदी अर्थात तिब्बत-नेपाल सीमावर्ती क्षेत्रमा आज आएको विनाशकारी बाढीका कारण ज्यान गुमाउने सम्पूर्ण प्रियजनप्रति सिक्किमेली जनताको तर्फबाट हार्दिक श्रद्धाञ्जली अर्पण गरेका छन्।उनले यस अपूरणीय क्षतिको पीडामा रहेका शोकसन्तप्त परिवारजनप्रति गहिरो समवेदना व्यक्त गरेका छन्। उनले बाढीबाट प्रभावित, विस्थापित एवं आफ्नो घर, सम्पत्ति र जीविकोपार्जन गुमाएका सम्पूर्ण दाजुभाई तथा दिदीबहिनीहरूप्रति हार्दिक सहानुभूति व्यक्त गरेका छन्।मुख्यमन्त्री तामाङले यस कठिन अनि दुःखद् घडीमा प्रभावित जनताको उद्धार, राहत तथा पुनर्स्थापनाका लागि नेपाल सरकार, सुरक्षा निकाय, उद्धार तथा राहतकर्मीहरू एवं स्थानीय समुदायले गरिरहेको निरन्तर, अथक अनि साहसिक प्रयासप्रति हार्दिक सम्मान व्यक्त गरेका छन्।उनले विपत्तिमा परेका सबैको शीघ्र उद्धार, सुरक्षित पुनर्स्थापना र जनजीवनको यथाशीघ्र सामान्यीकरणको निम्ति कामना सहित प्रार्थना गरेका छन्। उनले भने, ‘नेपाल हाम्रो छिमेकी राष्ट्र मात्र नभई सांस्कृतिक तथा भावनात्मक सम्बन्धले गहिरोसँग जोडिएको आत्मीय राष्ट्र हो। त्यसैले नेपालमा कुनै पनि विपत्ति आइपर्दा त्यसको पीडा र दुःख हामी यस भेकका जनताले पनि उत्तिकै महसुस गर्दछौँ।’उनले यस प्राकृतिक विपत्तिको सामना गर्ने शक्ति, साहस र धैर्यता सबै प्रभावित परिवारमा प्राप्त होस् भनि ईश्वर समक्ष प्रार्थना गरेका छन्। उनले यस दु:खद अनि विकट घडीमा हामी सबै उनीहरुको साथमा छौँ भन्दै सम्पूर्ण उपचाराधीन व्यक्तिहरुको शीघ्र स्वास्थ्यलाभको कामना गरेका छन्।