उपराष्ट्रपति सीपी राधाकृष्णनले सिक्किमको आधिकारिक भ्रमण सम्पन्न गरे

गान्तोक, 17 मई। भारतका उपराष्ट्रपति सीपी राधाकृष्णनले सिक्किमको आफ्नो आधिकारिक एकदिवसीय भ्रमण सम्पन्न गरेका छन्। उपराष्ट्रपति राज्यको ५१औँ राज्य दिवस समारोहमा सहभागी बन्न शनिबार सिक्किम आएका थिए।आज बिहान लोक भवनबाट प्रस्थान गर्नुअघि उपराष्ट्रपतिले पुरानो लोक भवन परिसरमा रोडोडेन्ड्रोन (लालीगुराँस) को बिरुवा रोपे। यस अवसरमा राज्यपाल ओमप्रकाश माथुर र मुख्यमन्त्री प्रेमसिंह तामाङ पनि उपस्थित थिए।उपराष्ट्रपति राष्ट्रिय राजमार्ग 10ए भएर बागडोगरा प्रस्थान गरेका छन्। उनको यो सिक्किमको पहिलो आधिकारिक भ्रमण थियो। भ्रमणका क्रममा उपराष्ट्रपति शनिबार मनन केन्द्रमा आयोजित ५१औँ राज्यत्व दिवस समारोहमा सहभागी भएका थिए। उनले राज्यमा कनेक्टिभिटी, शिक्षा, पर्यटन तथा सार्वजनिक सेवाहरू सुदृढ पार्ने उद्देश्यले विभिन्न प्रमुख विकास परियोजनाहरूको शिलान्यास तथा महत्वपूर्ण पूर्वाधार योजनाहरूको उद्घाटन पनि गरेका थिए।आफ्नो भ्रमण तालिकाअन्तर्गत उपराष्ट्रपतिले रिज पार्कस्थित अर्केडेरियम तथा देवरालीस्थित नामग्याल इन्स्टिच्युट अफ टिबेटोलोजीको भ्रमण गरेका थिए। उनले सिक्किमको समृद्ध सांस्कृतिक सम्पदा, जैविक विविधता तथा परम्परागत ज्ञान र सम्पदाको संरक्षणका लागि भइरहेका प्रयासहरूको प्रशंसा गरेका थिए।राज्य दिवस समारोहलाई सम्बोधन गर्दै उपराष्ट्रपतिले सिक्किमलाई सद्भाव, दिगोपन तथा अनुशासित जीवनशैलीको उदाहरणका रूपमा वर्णन गरे। उनले पर्यावरण संरक्षण, अर्गानिक खेती तथा समावेशी विकासमा राज्यले हासिल गरेका उपलब्धिहरूको प्रशंसा गरे।आज बिहान उपराष्ट्रपतिको प्रस्थानअघि लोक भवनमा राज्यपाल र मुख्यमन्त्री लगायत विधानसभा अध्यक्ष, मन्त्रिपरिषद्का सदस्यहरू, लोकसभा सांसद इन्द्रहाङ सुब्बा, मुख्य सचिव आर. तेलाङ तथा राज्य प्रशासनका वरिष्ठ अधिकारीहरूको उपस्थिति रहेको थियो।