एसकेएमले दियो सिक्किम पुलिसलाई बधाई

सामसन तामाङलाई पक्राउ गर्न सफल बनेकोमा एसकेएम पार्टीले सिक्किम पुलिस प्रशासनप्रति हार्दिक बधाई एवं धन्यवाद व्यक्त गरेको छ। सिक्किम पुलिसले कठोर खोजी अभियानपछि सामसन तामाङलाई बोधगयाबाट पक्राउ गरेर आफ्नो कार्यक्षमता र समर्पण प्रदर्शित गरेको एसकेएम प्रवक्ता विकास बस्नेतले विज्ञप्तिमा बताएका छन्।
प्रवक्ता बस्नेतले यस सफल कार्यले सामाजिक सद्भाव कायम राख्न र साम्प्रदायिक एकतालाई जोगाउन सिक्किम पुलिसको अडिग प्रतिबद्धतालाई दर्साएको बताएका छन्। उनले मुख्यमन्त्री पीएस गोलेको नेतृत्वमा सिक्किम पुलिस प्रशासनले तुरुन्तै कदम चाल्दै दोषीलाई खोजेर निकाल्न सफल बनेको बताएका छन्।
मुख्यमन्त्रीले यस्ता जाति विरोधी व्यक्तिलाई कुनै अवस्थामा पनि पक्राउ गरेर कारबाही गरिने अड़ान राखेका थिए भने सामसन तामाङको पक्राउले सामाजिक न्याय र साम्प्रदायिक सद्भावप्रति मुख्यमन्त्रीको अटल प्रतिबद्धता स्पष्ट भएको उनले बताएका छन्।
अर्कोतिर, सामसन तामाङको बयानलाई लिएर कतिपय विपक्षी राजनीतिक पार्टीका नेताहरूले यसलाई राजनीतिकरण गर्ने प्रयास गरेको बताउॅंदै प्रवक्ता बस्नेतले यसको घोर विरोध गरेका छन्। उनले सिक्किमेली जनतालाई एकता कायम राख्न र विभाजनकारी राजनीतिक एजेन्डामा नफस्न आग्रह गरेका छन्।
उनले साम्प्रदायिक हिंसा फैलाउने यस्ता तत्त्वविरुद्ध कानुनले आवश्यक कारबाही गर्ने विश्वास व्यक्त गरेका छन्। सामसन तामाङले यसरी साम्प्रदायिक हिंसा फैलाउने कुचेष्टा कसरी गऱ्यो र उसको पछाड़ि को छ, त्यसको पनि सरकार र प्रशासनले खोजी गर्नेछ भनी उनले विश्वास व्यक्त गरेका छन्।