एसकेएम खेलकुद शाखाले ‘राष्ट्रिय खेलकुद दिवस’ भव्यरूपमा पालन गर्ने

गान्तोक, 27 अगस्त। सिक्किम क्रान्तिकारी मोर्चा (एसकेएम) पार्टीको खेलकुद शाखाले आगामी 29 अगस्त ‘राष्ट्रिय खेलकुद दिवस’ भव्यरूपमा पालन गर्ने भएको छ। यस अवसरमा खेलकुद गतिविधिहरूका साथै सम्मान कार्यक्रम आयोजना गरिने छ। उक्त जानकारी आज एसकेएम खेलकुद शाखाका पदाधिकारीहरूले एक पत्रकार सम्मेलनमा दिए।
राजधानी स्थित पार्टी मुख्यालयमा आयोजित पत्रकार सम्मेलनमा एसकेएम खेलकुद शाखा अध्यक्ष रिन्जिङ वाङ्ग्याल छोपेलले आगामी 29 अगस्तका दिन राष्ट्रिय खेलकुद दिवस भव्यरूपमा पालन गरिने बताए। उनले सिक्किमलाई नशामुक्त बनाउने मुख्यमन्त्रीको सपनालाई खेलकुदको माध्यमद्वारा मात्र पूरा गर्न सकिने बताए।
यसैगरी, विधायक तेन्जिङ लाम्टाले यस दिनलाई फिटनेशप्रति जागरूकताको रूपमा पनि पालन गरिन्छ भनी बताए। उनले 2019 यता सिक्किममा खेलकुदको क्षेत्रमा धेरै काम भएको बताए। आफूले पनि क्लब चलाएको अनुभव साझा गर्दै पहिले सरकारबाट कुनै प्रकारको समर्थन प्राप्त नभएको बताए। वर्तमान सरकारले राज्यका सबै ठाउॅंहरूमा खेल पूर्वाधारहरू विकास गर्ने कार्य गरेको र राज्यका खेलाडीहरूले राष्ट्रिय र अन्तरराष्ट्रिय स्तरमा राम्रो प्रदर्शन गरिरहेको उनले बताए।
यस अघि एसकेएम खेलकुद शाखाका महासचिव निर्मल छेत्रीले यसपाली राष्ट्रिय खेलकुद दिवस भव्यरूपमा मनाउने तयारी गरिकएो जानकारी गराए। उनले कार्यक्रममा खेलकुदको क्षेत्रमा उल्लेखनीय योगदान दिने 50 जनालाई सम्मानित गर्ने कार्यक्रम रहेको बताए। यस अतिरिक्त, सिक्किम आक्रमण स्पोर्टिङ क्लब र सिक्किम ड्र्यागन्सबीच फुटबल म्याच आयोजना गरिने उनले बताए।
एसकेएम पार्टीका उपाध्यक्ष एवं मुख्यमन्त्रीका सल्लाहकार केएन लेप्चाले हकीको जादुगर नामले प्रसिद्ध ध्यानचन्दको जीवनमाथि प्रकाश पर्दै उनको सम्मानमा राष्ट्रिय खेलकुद दिवस पालन शुरू गरिएको जानकारी गराए। उनले मुख्यमन्त्री प्रेमसिंह तामाङको दूरदर्शी नेतृत्वमा सिक्किममा खेलकुदको क्षेत्रमा उल्लेखनीय काम भएको बताए। उनले वर्तमान सरकारले खेलकुदलाई उच्च प्राथमिकता दिएको छ भन्दै अन्य क्षेत्रहरूका साथै खेलकुदको क्षेत्रमा पनि सिक्किम अगाडि बढोस् भन्ने सरकारको सोच रहेको बताए।
एसकेएम प्रवक्ता बिकास बस्नेतले उक्त दिन बिहान सरकारी कार्यक्रम हुने र दिउॅंसो एसकेएम खेलकुद शाखाले कार्यक्रम आयोजना गर्ने जानकारी गराए।