एससीईआरटीले लाइब्रेरियनहरूका लागि पाँच दिने अभिमुखीकरण कार्यक्रम आयोजित

गान्तोक, 13 फरवरी। एससीईआरटीद्वारा आयोजित विद्यालयका लाइब्रेरियनहरूका लागि पाँच दिने अभिमुखीकरण कार्यक्रमको समापन सत्र आज एससीईआरटीमा सम्पन्न भयो।अभिमुखीकरण कार्यक्रम ९-१३ फरवरीसम्म सञ्चालन गरियो। यस कार्यक्रममा दीक्षा अन्तर्गत हिन्दी र नेपालीका नयाँ पाठ्यपुस्तकहरूका लागि स्क्रिप्ट लेखन सत्र पनि समावेश थियो।आफ्नो सम्बोधनमा ग्रामीण विकास विभागकी सल्लाहकार तथा विधायक काला राईले उदीयमान अवसरहरूसँग तालमेल मिलाउन आवश्यक रहेको बताउंदै विद्यालयहरूमा सुसज्जित पुस्तकालयहरू एकीकृत गर्नुको महत्व उल्लेख गरिन्। उनले ‘मानव पुस्तकालय’ को अवधारणाबारे कुरा गरिन् र बालबालिकामा पढ्ने बानी बसाल्नुको महत्व बताइन्, जसले बुझाइ र स्मरणशक्तिलाई बढाउन मद्दत गर्छ। उनले संस्कृति र मानव पुस्तकालयको भूमिकाले हाम्रा परम्परा र सम्पदासँग गहिरो सम्बन्ध जोड्ने कुरा विस्तारमा व्याख्या गरिन्। उनले सहभागीहरूलाई प्रशिक्षणबाट सिकेका कुराहरू आफ्नो विद्यालयमा लागू गर्न आग्रह गरिन्।आफ्नो सम्बोधनमा एससीईआरटीका प्रभारी निर्देशक शान्तिराम अधिकारीले कार्यक्रमको महत्व उजागर गर्दै प्रशिक्षणको उद्देश्यबारे विस्तृत व्याख्या गरे। यो प्रशिक्षणले राष्ट्रिय शिक्षा नीति (एनईपी) का सिफारिसअनुसार विद्यालयहरूमा कार्यात्मक पुस्तकालय स्थापना गर्न शिक्षाको गुणस्तरलाई सुदृढ़ र मजबुत बनाउने लक्ष्य राखेको बताए। उनले सहभागीहरूलाई आवश्यक सबै सहयोग र सहायता उपलब्ध गराउने आश्वासन दिए र प्रशिक्षणबाट प्राप्त ज्ञान तथा कौशलहरूको प्रभावकारी कार्यान्वयन हुने आशा व्यक्त गरे।कार्यक्रममा एससीईआरटीकी कार्यक्रम संयोजक तथा संकाय सदस्य निकिता गुरुङले पाँच दिने प्रशिक्षण कार्यक्रमको गहन अवलोकन प्रस्तुत गरिन्। उनले प्रशिक्षणमा समेटिएका विषयहरू र संलग्न स्रोत व्यक्तिहरूबारे विस्तारमा बताइन्। कार्यक्रममा मुख्य अतिथिले सहभागीहरूलाई प्रमाणपत्रहरू वितरण गरिन्।