एसडीएफको क्षेत्रीय स्तरीय समन्वय सभा सम्पन्न

गान्तोक, 27 अप्रेल। तिमी नामफिङ निर्वाचन क्षेत्रमा आज सिक्किम डेमोक्रेटिक फ्रन्ट (एसडीएफ) पार्टीको क्षेत्रीय स्तरीय समन्वय सभा सुमन तिवारीको अध्यक्षतामा सम्पन्न भयो। उक्त सभामा एसडीएफ पार्टीको दक्षिण सिक्किम नाम्ची जिल्ला समितिका सम्पूर्ण सदस्यहरू साथै तिमी नामफिङ निर्वाचन क्षेत्रका पार्टी कार्यकर्ताहरूको उपस्थिति जानकारी विज्ञप्तिमा दिइएको छ।
सभामा सम्बोधन राख्दै सुमन तिवारीले पार्टीका सहयोद्धाहरूसँग मिलेर एसडीएफ पार्टीका सिद्धान्तमा अडिग रही नेता पवन चाम्लिङको मार्गदर्शनमा सधैं अगाडि बढ्न आफू संकल्पित रहेको कुरा व्यक्त गर्दै उपस्थित पार्टी कार्यकर्ताहरूमा उत्साह र ऊर्जा थपे।
सभामा सहभागी सम्पूर्णले आ-आफ्ना सल्लाह र सुझाउहरू साझा गर्दै पार्टीको आगामी कार्यक्रमहरूलाई जिल्ला तथा क्षेत्रीय स्तरमा कसरी प्रभावकारी रूपमा सञ्चालन गर्ने विषयमा विस्तृत छलफल भएको बताइएको छ। वर्तमान सरकारको गलत नीतिका कारण सिक्किमका जनताले भोगिरहेका विकट समस्याबारे गहिरो कुराकानीको गर्दै, जनताको पक्षमा पार्टीले सरकारको गलत नीतिहरूको प्रभावकारी रूपमा विरोध कसरी गर्ने भन्ने विषयमा समेत विशेष चर्चा गरिएको विज्ञप्तिमा उल्लेख छ।