“जन आन्दोलनदेखि जनसरकार” नाराका साथ १४औं एसकेएम स्थापना दिवस पालन गरिने घोषणा

गान्तोक, 12 जनवरी । सिक्किम क्रान्तिकारी मोर्चा पार्टी (एसकेएम) को 14औँ स्थापना दिवसलाई लिएर आज राजधानीको मनन केन्द्रमा दोस्रो समन्वय बैठक आयोजन गरियो। एसकेएम पार्टी अध्यक्ष प्रेमसिंह तामाङको अध्यक्षतामा आयोजित सभामा 14औँ स्थापना दिवस पालन सम्बन्धमा अहिलेसम्म भएका तयारी र आगामी दिनमा गरिनुपर्ने काम कुराहरूमाथि व्यापक चर्चा गरियो। उक्त जानकारी आज एसकेएम सोशल मिडिया प्रकोष्ठका उपाध्यक्ष प्रभारी विकास बस्नेतले प्रेस विज्ञप्तिमा दिएका छन्।बैठकमा पार्टीका सेक्रेटेरी जेनरल अरुण कुमार उप्रेतीले 14औँ स्थापना दिवसलाई लिएर आजसम्म भएको तयारीबारे विस्तृत रूपमा जानकारी गराए। उनले समारोहका लागि गठित समिति लगायत विभिन्न भातृ सङ्गठन अनि व्यक्ति विशेषलाई दिइएको जिम्मेवारीबारे सभालाई अवगत गराए। बैठकलाई सम्बोधन गर्ने क्रममा पार्टीका अध्यक्ष तथा मुख्यमन्त्री प्रेमसिंह तामाङले 14औँ स्थापना दिवस सफलतापूर्वक सम्पन्न गराउन सामूहिक रूपमा अनि समर्पित भएर काम गर्न उपस्थित सम्पूर्ण प्रतिनिधिहरूलाई आह्वान गरे। उनले पार्टीको स्थापनाकालदेखि अनि सरकार गठनपछि आफुहरूले निरन्तर जनमुखी नीति र पहलहरू अपनाउँदै राज्यको कल्याण र विकासको लागि अथक प्रयास गर्दै आएको बताए।उनले 14औँ स्थापना दिवस समारोह “जन आन्दोलनदेखि जनसरकार” नाराका साथ पालन गरिने घोषणा गरे। यस वर्षको स्थापना दिवस विशेष रहने उल्लेख गर्दै यस समारोहमा व्यापक जनसहभागित रहने र यसले पार्टी-जनताबीचको प्रगाढ़ सम्बन्धनलाई प्रतिबिम्बित गर्ने बताए। पार्टी अध्यक्षले उपस्थित जनसमूहलाई एसकेएम पार्टीको सरकारले 6 वर्ष सात महिनाको अवधिमा गरेका उल्लेखनीय कार्यहरूबारे अवगत गराएका थिए। उनले एसकेएम पार्टी गरीब र निमुखा जनताको पक्षमा खोलिएको पार्टी भएको कारण आफूहरूको प्राथमिकता गरीब जनताको कल्याण, सुख-सुविधा, हेर्चाह र सेवाका लागि सदैव रहने उल्लेख गरे। उनले निकट भविष्यमा पार्टीको पाँचदिने सम्मेलन आयोजन गरिने पनि घोषणा गरे। एसकेएम पार्टीको मुख्यालयद्वारा आयोजन गरिएको सभामा पार्टीका केन्द्रिय कार्यकारिणी, मन्त्री-विधायकगण, जिल्लास्तरीय समिति, समष्टिस्तरीय समिति, सल्लाहकार तथा अध्यक्षगण, ओएसडी, पार्टीको भातृ सङ्गठनका प्रतिनिधिगण लगायत अन्यको व्यापक उपस्थिति रहेको थियो।