मुख्यमन्त्रीद्वारा दिवंगत चिकित्सक डा छिरिङ डोमा भोटियाप्रति श्रद्धाञ्जली अर्पण

गान्तोक, 08 फरवरी। मुख्यमन्त्री प्रेमसिंह तामाङले दिवंगत डा. छिरिङ डोमा भोटियाप्रति हार्दिक श्रद्धाञ्जली अर्पण गरेका छन्। सिक्किमले एक उज्जवल चिकित्सक गुमाउनु परेको उल्लेख गर्दै दिवंगत डा. भोटियाका मूल्य र विरासतले भावी पुस्तालाई प्रेरणा दिइरहने उनले बताएका छन्।
मुख्यमन्त्रीले आज सामाजिक सञ्जाल फेसबुक पोस्टमा दिवंगत चिकित्सकप्रति श्रद्धाञ्जली अर्पण गर्दै लेखेका छन्, ‘समर्पण, करुणा र वचनकी एक युवा डाक्टरले आफ्नो नि:स्वार्थ सेवा र उपचारप्रति अटल प्रतिबद्धताले अनगिन्ती जीवनहरू छोइन्। उनको असामयिक निधनले एक उज्ज्वल र हेरचाह गर्ने चिकित्सकलाई हामीले गुमाएका छौं, जसले उनको परिवारमा, उनका प्रियजनहरूमा, चिकित्सा समुदायमा र उनले सेवा गरेका सबैको हृदयमा गहिरो शून्यता छोडेको छ।’
मुख्यमन्त्रीले दिवंगत डा. भोटियाका मूल्य र विरासतले भावी पुस्ताहरूलाई प्रेरणा दिइरहनेछ भनी बताएका छन्। उनले शोक सन्तप्त परिवार र प्रियजनहरूप्रति हार्दिक समवेदना व्यक्त गर्दै दिवंगत आत्माको अनन्त शान्तिको लागि प्रार्थना गरेका छन्।
उल्लेखनीय छ, सिक्किमकी युरोलजिस्ट डा. छिरिङ डोमा भोटियाको गत 4 फरवरी, 2026 का दिन इन्दोरमा निधन भएको थियो। एक सम्मेलनमा आफ्नो प्रस्तुति दिने क्रममा उनी ढलेकी थिइन् र पछि अस्पतालमा उनको निधन भयो। उनी ब्रेन एन्युरिज्म भनेर चिनिने बिरामीले पीड़ित रहेको जानकारी प्रकाशित समाचारहरूमा उल्लेख छ।