गान्तोक, 18 फरवरी । मुख्यमन्त्री प्रेमसिंह तामाङले ब्याडमिन्टन एसोसिएशन अफ सिक्किम (बीएएस) का महासचिव सुकान्त दासलाई दुई प्रतिष्ठित अन्तरराष्ट्रिय प्रतियोगिताहरूका लागि भारतीय टोलीको प्रबन्धकको रूपमा मनोनित भएकोमा हार्दिक बधाई दिएका छन्। उनले दासको मनोनयनलाई सिक्किमको लागि गर्वको क्षण बताउॅंदै उनको सफल कार्यकालको लागि शुभकामना व्यक्त गरेका छन्।
मुख्यमन्त्रीले बुधवार बिहान सामाजिक सञ्जाल फेसबुक पोस्टमा आज बिहान आफ्नो सरकारी निवासमा ब्याडमिन्टन एसोसिएशन अफ सिक्किमका महासचिव सुकान्त दाससॅंग भेट गरेको जानकारी गराएका छन्। उनको साथमा बीएएसका अध्यक्ष जेकब खालिङ पनि उपस्थित थिए।
मुख्यमन्त्रीले सुकान्त दासलाई दुई प्रतिष्ठित अन्तरराष्ट्रिय प्रतियोगिताहरू, नेदरल्याण्डको हार्लेममा आयोजना हुने ‘डच जुनियर इन्टरनेशनल ग्रान्ड प्रिक्स’ र जर्मनीको लुडिङहाउसेनमा आयोजना हुने ‘जर्मन जुनियर इन्टरनेशनल ग्रान्ड प्रिक्स’, का लागि भारतीय टोलीको प्रबन्धकको रूपमा मनोनित गरिएको जानकारी गराउॅंदै खुशी व्यक्त गरेका छन्।
ब्याडमिन्टन एसोसिएशन अफ इण्डियाले दासलाई यो महत्वपूर्ण जिम्मेवारी सुम्पनु सिक्किमको लागि पनि गर्वको क्षण रहेको उनले उल्लेख गरेका छन्। मुख्यमन्त्रीले भने, ‘यो मान्यताले राज्यमा ब्याडमिन्टनको प्रवर्द्धनमा दासको अटल समर्पण र बहुमूल्य योगदानलाई प्रतिबिम्बित गर्दछ।’
मुख्यमन्त्रीले दासलाई यो उल्लेखनीय उपलब्धिको लागि हार्दिक बधाई एवं सफल कार्यकालको लागि शुभकामना दिएका छन्।
