राजधानीमा आजदेखि ‘सिक्किम अन्तरराष्ट्रिय फिल्म महोत्सव 2026’ शुरू भएको छ।

गान्तोक, 19 मार्च । राजधानीमा आजदेखि ‘सिक्किम अन्तरराष्ट्रिय फिल्म महोत्सव 2026’ शुरू भएको छ। यस महोत्सवको आयोजना सूचना तथा जनसम्पर्क विभागले सूचना एवं प्रसारण मन्त्रालय र राष्ट्रिय चलचित्र विकास निगमको संयुक्त तत्वावधानमा गरिरहेको छ।
यहॉंको मनन केन्द्रमा बिहान महोत्सवको उद्घाटन समारोह आयोजना गरियो, जसमा सिक्किमका राज्यपाल ओमप्रकाश माथुर मुख्य अतिथि तथा मुख्यमन्त्री प्रेमसिंह तामाङ विशिष्ट अतिथि थिए। राज्यपाल माथुरले सिक्किम अन्तरराष्ट्रिय फिल्म महोत्सव शुरू भएको आधिकारिक रुपमा घोषणा गरे। महोत्सवको समापन आगामी 22 मार्चका दिन हुनेछ।
उद्घाटन समारोहलाई सम्बोधन गर्दै मुख्यमन्त्री तामाङले राज्य सूचना तथा जनसम्पर्क विभागको तत्वावधानमा आयोजना गरिएको सिक्किम अन्तरराष्ट्रिय चलचित्र महोत्सव 2026 को पहिलो संस्करण आयोजना गर्नु सिक्किमको लागि ठूलो गर्व र सम्मानको कुरा रहेको बताए। उनले प्रधानमन्त्री नरेन्द्र मोदी, राज्यपाल ओमप्रकाश माथुर, सूचना तथा प्रसारण मन्त्रालय र राष्ट्रिय चलचित्र विकास निगमलाई उनीहरूको निरन्तर सहयोग र संरक्षणको लागि हार्दिक आभार व्यक्त गरे।
मुख्यमन्त्रीले कला, संस्कृति र रचनात्मक अभिव्यक्तिको विश्वव्यापी केन्द्रको रूपमा स्थापित हुने सिक्किमको यात्रामा यो महोत्सव महत्वपूर्ण कोशेढुङ्गा बन्ने विश्वास व्यक्त गरे। उनले पूर्वी हिमालय क्षेत्रमा सिनेमा, रचनात्मकता र सांस्कृतिक आदानप्रदानका लागि सिक्किमलाई जीवन्त भेटघाट बिन्दुको रूपमा स्थापित गर्न यो महोत्सव एउटा महत्त्वपूर्ण सांस्कृतिक पहल रहेको उल्लेख गरे।
मुख्यमन्त्रीले महोत्सवमा सिक्किम, उत्तर बंगाल, नेपाल र भुटानका फिल्म निर्माताहरूका लागि खुल्ला लघु फिल्म प्रतियोगिता, फिल्म बजार जस्ता प्रमुख घटकहरू समावेश गरिएको बताए, जसले फिल्म निर्माताहरू र रचनात्मक व्यवसायिकहरूलाई विचारहरू प्रस्तुत गर्न, वित्तपोषणका अवसरहरू अन्वेषण गर्न र फराकिलो दर्शकहरूसँग जोडिन मञ्च प्रदान गर्नेछ। यसैगरी, इण्डस्ट्रीका विशेषज्ञहरूद्वारा कार्यशाला र मास्टरक्लासहरूले सहभागीहरूलाई व्यावहारिक सीप र अन्तर्दृष्टि प्रदान गर्नेछन्, जसले रचनात्मक पारिस्थितिक प्रणाली बलियो हुने उनले बताए।
कार्यक्रममा सिक्किमका तीन फिल्म निर्माताहरू त्रिवेणी राई, प्रशान्त रसाइली र साम्तेन भोटियालाई चलचित्र निर्माणको क्षेत्रमा उनीहरूका उल्लेखनीय योगदानका लागि सम्मानित गरियो। सम्मानित व्यक्तित्वहरूलाई मुख्यमन्त्रीको बाहुलीद्वारा खादा लगाइदिएर अभिनन्दन पत्र अर्पण गरियो।
यस अतिरिक्त, लघु फिल्म प्रतियोगिता 2026 को परिणाम घोषणा उद्घाटन समारोहको आकर्षण थियो। यस प्रतियोगितामा दार्जिलिङका सुजन लम्जेलद्वारा निर्देशित ‘डोकोको छाहारी’ ले प्रथम पुरस्कार जित्यो। उनलाई पुरस्कार स्वरुप तीन लाख रूपियॉं प्रदान गरियो। यसरी नै दोस्रो पुरस्कार अनन्तदिप रसाइलीको ‘सेतोघारी’ र तेस्रो पुरस्कार अरबिन्द राईको ‘इटरनल किनशिप’ ले जित्यो। नेपाल निवासी निर्देशकद्वयलाई क्रमश: दुई र एक लाख रूपियॉं प्रदान गरियो।