गान्तोक, 14 अप्रेल 2025
सिक्किम विधानसभा परिसरमा आज 134औं आम्बेडकर जयन्तीको अवसरमा एक समारोह आयोजन गरियो। समारोहमा राज्यपाल ओमप्रकाश माथुर मुख्य अतिथिको रूपमा सम्मिलित बने। राज्यपालले डा. आम्बेडकरका विचारहरू र उनको योगदानको स्मरण गर्दै पुष्पाञ्जलि अर्पित गरे।
समारोहमा मुख्यमन्त्री प्रेमसिंह तामाङ, विधानसभा अध्यक्ष एमएन शेर्पा, उपाध्यक्ष राजकुमारी थापा, मन्त्रीगण, विधायकगण, सल्लाहकारगण, गान्तोकका मेयर, उपमेयर तथा अन्य गणमान्य व्यक्तिहरू पनि उपस्थित थिए।
राज्यपाल माथुरले आफ्नो सम्बोधनमा डा. आम्बेडकरको 134औं जयन्तीको सबै राज्यवासीहरूलाई बधाई दिए। उनले आजको अवसरले हामीलाई ती महान व्यक्तित्वहरूको सम्झाना गर्ने अवसर प्रदान गर्दछ, जसले सामाजिक न्याय, समता, समानता र समावेशी विकासलाई सुदृढ़ गर्ने दिशामा आफ्नो महत्वपूर्ण योगदान दिएको बताए।
सिक्किमले सामाजिक समरसताको निर्माणमा एक अनुकरणीय उदाहरण प्रस्तुत गरेको राज्यपालले बताए। उनले हाम्रो राज्यको सुनौलो, समृद्ध र समर्थ सिक्किमको भिजनले भारतको समावेशी विकासमा योगदान दिइरहेको छ र विकसित भारतको लक्ष्य प्राप्तिप्रति संकल्पित छ भनी बताए। उनले बाबा साहेब आम्बेडकरका आदर्शहरूलाई अपनाउॅंदै सिक्किम एउटा यस्तो राज्य बनोस्, जसले सामाजिक र आर्थिक मोर्चामा सारा देशलाई नेतृत्व गरोस् भनी बताए।
