लाचुङ मार्गका सबै अवरोधहरू हटाइयो, फसेका पर्यटकहरूको उद्धार कार्य शुरू

मंगन, 26 अप्रेल। उत्तर सिक्किमको लाचुङ मार्गका सडक अवरोधहरू सफलतापूर्वक हटाइएको छ। सडक अवरोधहरू हटाइएपछि लाचेन र लाचुङबाट फसेका पर्यटकहरूको उद्धार कार्य तुरुन्तै शुरु गरिएको छ। उक्त जानकारी उत्तर जिल्ला प्रशासनले दिएको छ।
यो महत्वपूर्ण कार्य धेरै निकायहरू र सरोकारवालाहरूको समन्वित र एकीकृत प्रयासको परिणाम रहेको जिल्ला प्रशासनले बताएको छ। जिल्लापाल अनन्त जैनको अगुवाईमा जिल्ला प्रशासनले चुङथाङका एसडीएम र चुङथाङका एसडीपीओले लाचुङ जुम्साका पिपन, ट्राभल एजेन्ट्स एसोसिएशन अफ् सिक्किम, ग्रेफ, पर्यटन विभाग र ट्याक्सी चालक संगठनहरूको समन्वयमा पुनर्स्थापना कार्यलाई अगाडि बढाइएको थियो। यसैगरी, एके बिल्डर्स र एसयुएलले कार्यबल र मेसिनहरूको महत्वपूर्ण सहयोग प्रदान गरेको थियो।
हिजो शुरु भएको उद्धार कार्य चुङथाङबाट गरिएको थियो र फसेका पर्यटकहरूको सुरक्षित आवागमनलाई सफलतापूर्वक सहज बनाइएको थियो। जिल्ला प्रशासनले सबै विभाग, संघ र व्यक्तिहरूप्रति उद्धार प्रक्रियाको सफलता सुनिश्चित गर्न गरेको अथक प्रयासको निम्ति हार्दिक आभार प्रकट गरेको छ। प्रत्येक व्यक्तिको सुरक्षा र कल्याण सर्वोच्च प्राथमिकता रहेको बताउॅंदै सबैको लागि निर्बाध यात्रा र सहयोग सुनिश्चित गर्न जिल्ला प्रशासनले परिस्थितिमाथि नजिकबाट निगरानी गरिरहेको बताएको छ।