सब इन्स्पेक्टर भर्तीमा भएको कथित राजनीतिक हस्तक्षेपको आरोपमा एसडीएफद्वारा पारदर्शिताको माग

गान्तोक, 27 नोभेम्बर । सिक्किम डेमोक्रेटिक फ्रण्ट (एसडीएफ) पार्टीले सब इन्स्पेक्टर भर्तीमा भएको कथित राजनीतिक हस्तक्षेपको आरोपलाई लिएर राज्य सरकारलाई कठघरामा उभ्याएको छ। एसडीएफले उक्त आरोपको विषय सरकारबाट पूर्ण पारदर्शिताको माग गरेको छ।
सिक्किम लोक सेवा आयोग (एसपीएससी) द्वारा जारी गरिएको सब इन्स्पेक्टर भर्तीको परिणाम घोषणा सिक्किममा आज चर्चाको विषय बनेको एसडीएफले आज प्रेस विज्ञप्तिमा बताएको छ। बढ्दो संख्यामा उम्मेदवारहरूका साथै स्वतन्त्र पर्यवेक्षकहरूले प्रक्रियाको निष्पक्षता र अखण्डतामाथि गम्भीर प्रश्न उठाइरहेको एसडीएफले दाबी गरेको छ।
एसपीएससीद्वारा छनोट गरिएका धेरै उम्मेदवारहरूको सत्तारुढ़ दलसँग नजिकको सम्बन्ध रहेको आरोप लागिरहेको बताउॅंदै यसले मूल्याङ्कन प्रणालीमा पूर्ण पारदर्शिता र जवाफदेहिताको माग तीव्र बन्न थालेको एसडीएफको भनाई रहेको छ। सामाजिक सञ्जाल र स्थानीय सञ्चार सञ्जालहरूमा व्यापक रूपमा शंकाको प्रसारले मुद्दाको गम्भीरतालाई प्रतिबिम्बित गर्दछ।
यस विषयमा रिपोर्टहरू संकलन गरेपछि एसडीएफले यस मुद्दालाई अत्यन्त गम्भीरताका साथ लिएको बताउॅंदै प्रभावित सबै आकांक्षीहरूप्रति ऐक्यबद्धता प्रकट गरेको छ। एसडीएफले एसपीएससीलाई प्रवेश परीक्षा र एसआई मुख्य परीक्षा दुवै उत्तीर्ण गर्ने सबै उम्मेदवारहरूको विस्तृत स्कोरकार्ड प्रकाशित गर्न माग गरेको छ। एसडीएफले योग्यता, न्याय र आरक्षण नीतिका सिद्धान्तहरूलाई कायम राख्न आवश्यक रहेको बताएको छ।