नाम्ची, 28 अगस्त। नाम्ची जिल्लाको छवटा ग्राम पञ्चायत एकाईका लाभार्थीहरूलाई आज सिक्किम आमा सहयोग योजना अन्तर्गत चेक वितरण गरिएको छ। जानकारी अनुसार, दामथाङ जीपीयू, कामराङ जीपीयू, मामले जीपीयू, आसाङथाङ जीपीयू, सोरोक श्यामपानी जीपीयू र तिङरिथाङ जीपीयूका लाभार्थीहरूलाई चेक वितरण गरियो।
शहरी विकास विभाग र खाद्य, एवं नागरिक आपूर्ति विभाग मन्त्री भोजराज राईको बाहुलीद्वारा लाभार्थीहरूलाई चेक वितरण गरियो। यस अवसरमा भवन तथा आवास विभागका अध्यक्ष साइमन कुलुङ, एडीसी डा. सीपी राई, ओएसडी छिरिङ डेम भोटिया आदि उपस्थित थिए।
सिक्किम आमा योजना अन्तर्गत बीपीएल वर्गमा पर्ने आमाहरूलाई वर्षमा चारवटा एलपीजी रिफिल नि:शुल्क रूपमा प्रदान गरिन्छ। आजको कार्यक्रममा 50 जना लाभार्थीहरूलाई 4,400 (प्रत्येक) रूपियॉंको चेक वितरण गरियो। यस कार्यक्रमको शुभारम्भ मुख्यमन्त्री प्रेमसिंह तामाङले 10 अगस्त, 2025 का दिन रम्फूमा आयोजित आमा सम्मान दिवसमा गरेका थिए।
