सीएपी र एसडीएफ पार्टीका वरिष्ठ नेताहरु एसकेएम पार्टीमा सामेल

गान्तोक, 31 जनवरी। विपक्षी राजनीतिक दलहरु त्यागेर सत्तारुढ़ एसकेएम पार्टीमा सामेल हुने क्रम जारी रहेको छ। सिटिजन एक्सन पार्टी (सीएपी) सिक्किम र सिक्किम डेमोक्रेटिक फ्रण्ट (एसडीएफ) पार्टीका नेताहरू एसकेएम पार्टीमा सामेल भएका छन्। उनीहरूमा सीएपी नेता विकास शर्मा र एसडीएफ उपाध्यक्ष प्रभारी बसन्त लामिछाने सामेल छन्।
उक्त जानकारी आज मुख्यमन्त्री प्रेमसिंह तामाङले सामाजिक सञ्जाल फेसबुक पोस्टमा दिएका छन्। मुख्यमन्त्रीले तिमी–नाम्फिङ निर्वाचन क्षेत्र निवासी पूर्व पञ्चायत सभापति तथा २०२४ को आम निर्वाचनमा तिमी–नाम्फिङ निर्वाचन क्षेत्रबाट सीएपीका पूर्व उम्मेदवार विकास शर्मालाई एसकेएम परिवारमा स्वागत जनाएका छन्।
यसरी नै मुख्यमन्त्री तामाङले एसडीएफ उपाध्यक्ष प्रभारी बसन्त लामिछानेलाई एसकेएम पार्टीमा स्वागत जनाउंदै खुशी व्यक्त गरेका छन्।
मुख्यमन्त्रीले उनीहरूको अनुभव र तृणमूल स्तरमा बलियो सम्पर्कले एसकेएमको साझा दृष्टिकोणलाई अझ सुदृढ़ बनाउँदै पार्टीको आन्दोलनलाई नयाँ ऊर्जा र गति प्रदान गर्ने विश्वास व्यक्त गरेका छन्। उनले एकता, इमान्दारी र समर्पित जनसेवाको भावनासहित काम गर्ने अपेक्षासहित उनीहरूलाई हार्दिक शुभेच्छा व्यक्त गरेका छन्।