स्वास्थ्य सेवाको क्षेत्रमा सिक्किम पूर्वोत्तरमै उत्कृष्ट रहेको विधायक कला राईको दाबी

गान्तोक, 26 मार्च । अप्पर बुर्तुक निर्वाचन क्षेत्रकी विधायक कला राईले स्वास्थ्य क्षेत्रलाई वर्तमान सरकारले उच्च प्राथमिकता दिॅंदै यस क्षेत्रमा व्यापक सुधार ल्याउने काम गरेको बताएकी छन्। उनले स्वास्थ्य सेवाहरूको क्षेत्र सिक्किम पूर्वोत्तर राज्यकै उत्कृष्ट राज्य रहेको दाबी पनि गरेकी छन्।
विधायक राई आज सिक्किम विधानसभाको एक दिवसीय सत्रमा राज्यपालको अभिभाषणमाथि धन्यवाद प्रस्तावमा बोल्दै थिइन्। यस अघि राज्यपाल ओमप्रकाश माथुरले सदनमा लेखानुदानमाथि आफ्नो अभिभाषण प्रस्तुत गरेका थिए। विधायक राईले 2019 मा एसकेएम पार्टीको सरकार गठन भएपछि राज्यमा स्वास्थ्य सेवाहरूको क्षेत्रमा उल्लेखनीय कार्य भएको बताइन्। पहिलेको सरकारमा राज्यका जनताले स्वास्थ्य क्षेत्रमा ठूलो चुनौतीको सामना गर्नु पर्ने स्थिति थियो भने तत्कालीन सरकारबाट पनि कुनै प्रकारको समर्थन नपाएको उनले आरोप लगाइन्।
अर्कातिर, वर्तमानमा राज्यका जनताले हर प्रकारका सुविधाहरू प्राप्त गरिरहेको दाबी गर्दै उनले यसको श्रेय मुख्यमन्त्री पीएस तामाङलाई दिइन्। उनले सिक्किममा उपलब्ध उत्कृष्ट स्वास्थ्य सेवाहरूका कारण आज छिमेकी दार्जिलिङ लगायत नेपाल र भुटानबाट पनि बिरामीहरू यहॉं उपचारको लागि आउने गरेको अवगत गराइन्। सिक्किम सरकारले अब आईवीएफ उपचार पनि शुरू गर्ने दिशामा काम गरिरहेको उनले बताइन्।
यसैगरी, विधायक सुदेश कुमार सुब्बा, विधायक इरुङ तेन्जिङ लेप्चा, विधायक आदित्य गोले र विधायक सोनाम भेन्चुङ्गपा पनि धन्यवाद प्रस्तावमा सहभागी बनेका थिए।