263 जनाले स्वेच्छापूर्वक ट्रेड लाइसेन्स समर्पण गरे

शहरी विकास विभागका मन्त्री भोजराज राईको उपस्थितिमा आज राजधानी गान्तोकमा आयोजित एक कार्यक्रमबीच 263 जनाले लाइसेन्स सबलेटिङ विरुद्ध नियमहरूको पालन गर्दै आफ्नो ट्रेड लाइसेन्स स्वेच्छापूर्वक समर्पण गरेका छन्। शहरी विकास विभागले गान्तोक नगर निगमसँगको सहकार्यमा स्वेच्छाले आफ्नो व्यापार लाइसेन्स समर्पण गर्नेहरूलाई सम्मान गर्न देवरालीस्थित जीएमसी कार्यालयको पञ्चायतीराज सम्मेलन हलमा एक धन्यवाद कार्यक्रम आयोजना गऱ्यो।
कार्यक्रमलाई मुख्य अतिथिको रूपमा सम्बोधन गर्दै मन्त्री भोजराज राईले सिक्किम र सिक्किमेली जनताको हितको निम्ति सोंचेर यसरी व्यापार लाइलेन्स समर्पण गर्नेहरूप्रति सरकारको तर्फबाट हार्दिक आभार व्यक्त गरे। सरकारको यस पहललाई साथ र समर्थन दिॅंदै यसरी स्वेच्छाले ट्रेड लाइसेन्स समर्पण गर्दै आइरहेको जनाउँदै राज्यका अन्य बजार र ग्रामीण भेगमा पनि मानिसहरुले व्यापार लाइसेन्सहरू समर्पण गर्दै आइरहेको जानकारी गराए। यो कार्यले खाँटी सिक्किमेली जनताको भावी पुस्ताको भविष्य उज्वल बन्ने विचार व्यक्त गर्दै उनले सरकारको यो पहलले आउँदो दिनमा सिक्किमेलीहरूलाई ठुलो लाभ पुऱ्याउने विचार राखे।
यो कदमले सिक्किममा बढ्दो अनुप्रवेशकारीको संख्यामा कमी आउने विचार व्यक्त गर्दै यसलाई मन्त्री राईले सिक्किम र सिक्किमेली जनताको हितमा सरकारको यो ठूलो पहल रहेको बताए। यस पहलले भोलि ठूलो लाभ प्राप्त हुने विचार राख्दै उनले अन्यहरूलाई पनि सिक्किम र सिक्किमेको पक्षमा स्वेच्छापूर्वक समयमै लाइसेन्स समर्पण गर्न आह्वान गरेका छन्। आज 2 सय 63 जनाले लाइसेन्स समर्पण गर्नु भनेको 2 लाख 63 हजार जनाको जीवन राम्रो बन्नु हो भन्ने मन्त्री राईले आफ्नो सम्बोधनमा बताए।
आजको यस धन्यवाद कार्यक्रममा गान्तोक निर्वाचन क्षेत्रका विधायक तथा विभागका सल्लाहकार दिले नामग्याल बर्फुङपा, मेयर नीलबहादुर छेत्री, उप मेयर छिरिङ पाल्देन भोटिया, पार्षदगण, आयुक्त आरबी भण्डारी लगायत अन्य व्यक्तिहरूको पनि उपस्थिति रहेको थियो।