9 औँ जन उन्मुक्ति दिवस तथा दोस्रो आमा सम्मान दिवसको तयारी तीव्र

गान्तोक, 01 अगस्त। आगामी 10 अगस्त, 2026 मा नाम्चीस्थित भाइचुङ स्टेडियममा आयोजना हुने दोस्रो आमा सम्मान दिवस कार्यक्रमको तयारीलाई प्रभावकारी र व्यवस्थित बनाउन दोस्रो समन्वय सभा आज सम्पन्न भएको छ। सभामा कार्यक्रमको समग्र तयारी, विभिन्न निकायबीचको समन्वय, जिम्मेवारी बाँडफाँड तथा कार्यक्रमलाई भव्य, मर्यादित र सफल रूपमा सम्पन्न गराउने विषयमा विस्तृत छलफल गरिएको थियो।प्रेस विज्ञप्तिमा भनिएको छ, सभाको अध्यक्षता पार्टीका मुख्य संयोजक तथा मन्त्री सोनाम लामाले गरेका थिए। सभामा पार्टीका सेक्रेटरी जेनरल तथा मन्त्री अरुण उप्रेती, मन्त्रीगण, विधायकहरू, ओएसडी, अध्यक्षगण, सल्लाहकारहरू, विभागीय अधिकारीगण, पार्टी कार्यकर्ता लगायत अन्यको उल्लेखनीय उपस्थिति रहेको थियो। सभामा सहभागी सबै पक्षले आमा सम्मान दिवसलाई ऐतिहासिक, अनुशासित र सफल बनाउन आ- आफ्नो जिम्मेवारी पूर्ण समर्पणका साथ निर्वाह गर्ने प्रतिबद्धता व्यक्त गरेका थिए।आमा सम्मान दिवसले एसकेएम सरकारले आमाहरूको अमूल्य योगदानप्रति सम्मान व्यक्त गर्दै उनीहरूको शक्ति, गरिमा, त्याग र समृद्ध समाज निर्माणमा रहेको महत्त्वपूर्ण भूमिकाको उच्च कदर गर्ने आफ्नो प्रतिबद्धतालाई पुनः उजागर गरेको बताइएको छ।