रिम्बीको पैह्रोप्रति मुख्यमन्त्री तामाङद्वारा दुःख व्यक्त, अधिकारीलाई उच्च सतर्कतामा रहन निर्देशन

गान्तोक, २५ सेप्टेम्बर। पश्चिम सिक्किमको गेजिङ जिल्लाअन्तर्गत रिम्बीमा बिहीबार राति गएको भीषण पैह्रोपछि उत्पन्न अवस्थाप्रति मुख्यमन्त्री प्रेमसिंह तामाङले गहिरो दुःख र चिन्ता व्यक्त गरेका छन्। मुख्यमन्त्री तामाङले शुक्रबार बिहान सामाजिक सञ्जालमार्फत रिम्बीको अवस्था गम्भीर रहेको उल्लेख गर्दै जनताको सुरक्षा र कल्याण सरकारको सर्वोच्च प्राथमिकता रहेको बताएका छन्।मुख्यमन्त्री तामाङले कठिन परिस्थितिमा सरकार रिम्बीका जनतासँग दृढतापूर्वक उभिएको बताएका छन्। उनले सम्बन्धित अधिकारीहरूलाई उच्च सतर्कतामा रहन, अवस्थाको नजिकबाट निगरानी गर्न तथा जनताको सुरक्षा र संरक्षण सुनिश्चित गर्न सम्भव सबै उपाय अपनाउन आवश्यक निर्देशन दिइएको जानकारी दिएका छन्।उनले रिम्बीका बासिन्दाहरूले भोगिरहेको गहिरो पीडा र अनिश्चिततालाई आफूले बुझेको बताएका छन्। विशेषगरी शुरुदेखि नै कठिनाइहरू निरन्तर रहँदै आएको उल्लेख गर्दै मुख्यमन्त्रीले पैह्रोबाट प्रभावित प्रत्येक परिवारप्रति आफ्नो सहानुभूति र प्रार्थना रहेको बताएका छन्।मुख्यमन्त्री तामाङले मूसलधारे वर्षाका क्रममा सबैलाई सतर्क रहन र सुरक्षित रहन आग्रह गरेका छन्। साथै, सम्बन्धित अधिकारीहरूले जारी गरेका सुझाउ तथा निर्देशनहरूको पालना गर्न र एकअर्कालाई सम्भव भएसम्म सहयोग गर्न पनि अपिल गरेका छन्।मुख्यमन्त्रीले सरकारले रिम्बीको अवस्थालाई नजिकबाट निगरानी गरिरहेको र जनताको सुरक्षा गर्न आवश्यक सबै कदम निरन्तर चालिरहने बताएका छन्।