सिटिजन एक्सन पार्टी, सिक्किमका पूर्व अध्यक्ष एलपी काफ्लेले सीएपी नेतृत्वमाथि आफ्नो मूल सिद्धान्तबाट भट्किएको आरोप लगाएका छन्।

यस कारण उनी लगायत धेरै अन्यहरू पार्टी छोड्न बाध्य बनेको उनले दाबी गरेका छन्।
राजधानीमा आज आयोजित एक पत्रकार सम्मेलनमा बोल्दै सीएपी पूर्व अध्यक्ष काफ्ले यस्तो आरोप लगाएका हुन्। काफ्लेले सीएपी नेतृत्वमाथि आफ्नो संस्थापक आदर्शहरूलाई कायम राख्न असफल भएको आरोप लगाए। उनले सुधारवादी राजनीति र सामूहिक नेतृत्वप्रति सीएपीको प्रारम्भिक प्रतिबद्धतालाई पार्टी नेतृत्वले पालना नगरेको बताए।
उनले पार्टीलाई एकल नेतृत्वले नियन्त्रणमा लिएको र पार्टीका प्रमुख निर्णयहरू गर्दा आन्तरिक छलफललाई बेवास्ता गरिएको पनि आरोप लगाए। उनले सरकारको हरेक कार्यक्रमहरूको विरोध गरिरहेकोमा पनि सीएपीको आलोचना गरे। उनले सकारात्मक पहलहरूलाई स्वीकार पनि गर्नुपर्छ भने।
पत्रकार सम्मेलनमा सीएपी सिक्किमबाट राजीनामा दिने नेतृत्वहरू दाउछो लेप्चा, लाक्पा शेर्पा, रवि गुरुङ र डा. एस. मदन रसाइली पनि उपस्थित थिए। उनीहरूले पनि सीएपी नेतृत्वमाथि आफ्ना आदर्शहरूलाई कायम राख्न नसकेको आरोप लगाएका छन्।