मुख्यमन्त्रीले पद्म श्री प्रापक नरेन गुरुङलाई दिए हार्दिक बधाई

गान्तोक, 29 अप्रेल। सिक्किमका एक प्रख्यात लोक नर्तक एवं गायक नरेन गुरुङ प्रतिष्ठित पद्म श्री पुरस्कारले पुरस्कृत बनेका छन्। राष्ट्रिय राजधानी नयॉं दिल्लीमा सोमवारमा आयोजित एक समारोहमा राष्ट्रपति द्रौपदी मुर्मूको बाहुलीद्वारा कलाकार गुरुङलाई पद्म श्रीले सम्मानित गरियो।
मुख्यमन्त्री प्रेमसिंह तामाङले नरेन गुरुङलाई पद्म श्रीले सम्मानित बनेकोमा हार्दिक बधाई दिएका छन्। उनले सोमवार सामाजिक सञ्जाल पोस्टमा यो गौरवशाली उपलब्धि सिक्किमको समृद्ध लोक परम्परा र सांस्कृतिक सम्पदाको संरक्षण र प्रवर्द्धनमा नरेन गुरुङको असाधारण योगदानको प्रतिबिम्ब रहेको उल्लेख गरेका छन्। उनको समर्पण र कलात्मकताले राज्यलाई गौरवान्वित तुल्याएको उनले बताएका छन्।
मुख्यमन्त्रीले सिक्किमका जनताको तर्फबाट नरेन गुरुङको निरन्तर सफलता र प्रेरणादायी यात्राको लागि हार्दिक बधाई र शुभकामना व्यक्त गरेका छन्।