पीसीएस र आईपीआर विभागले स्वर्ण जयन्ती सम्मेलन ‘सिक्किम@50’ आयोजना गर्ने

गान्तोक, 11 मई। प्रेस क्लब अफ् सिक्किम र राज्य सूचना एवं जन सम्पर्क विभागको संयुक्त तत्वावधानमा आगामी 13 मईका दिन स्वर्ण जयन्ती सम्मेलन ‘सिक्किम@50’ आयोजना गरिने भएको छ। सिक्किम राज्य स्थापनाको 50औं वर्षगॉंठको अवसरलाई ध्यानमा राखेर आयोजना गरिने उक्त कार्यक्रममा सिक्किमका राज्यपाल ओम प्रकाश माथुर मुख्य अतिथि रहनेछन्।
प्रेस क्लबका अध्यक्ष भीम राउतले सिक्किमको 50औं राज्य दिवसको अवसरमा प्रेस क्बल र आईपीआर विभागले स्वर्ण जयन्ती सम्मेलन ‘सिक्किम@50’ आयोजना गर्ने निर्णय लिएको आज एक पत्रकार सम्मेलनमा अवगत गराए। उनले मुख्यमन्त्री प्रेमसिंह तामाङ यस कार्यक्रमका प्रमुख संरक्षक रहेको जानकारी गराउॅंदै कार्यक्रममा राज्यपाल ओम प्रकाश माथुर मुख्य अतिथि रहने बताए।
सम्मेलन आयोजना गर्नुको उद्देश्यमाथि प्रकाश पार्दै उनले पचास वर्षको यात्रामा सिक्किमका उपल​ब्धीहरू र गर्नुपर्ने कुराहरूमाथि छलफल गर्न यो सम्मेलन आयोजना भइरहेको बताए। उनले कार्यक्रममा सिक्किम लगायत देशका विभिन्न ठाउॅंहरूबाट प्रतिष्ठित व्यक्तित्वहरूलाई प्यानलिस्टको रूपमा आमन्त्रित गरिएको जानकारी गराए।
यसरी नै प्रेस क्लबका संस्कृति सचिव निर्मल मंगरले कार्यक्रममा प्यानिस्टको रूपमा आमन्त्रित प्रतिष्ठित व्यक्तित्वहरूको बारेमा जानकारी गराए। उनले यो सम्मेलन मार्फत राज्य सरकारलाई नीति निर्धारणमा मद्दत मिलोस् भन्ने पनि आयोजक पक्षको धेय रहेको बताए।
आईपीआर विभागकी डीआईओ सरोजनी सुब्बाले राज्य सरकार चौथो स्तम्भलाई अगाडि बढाउन अनुकूल वातावरण सुनिश्चित गर्न प्रतिबद्ध रहेको बताइन्। उनले सम्मेलनको सफलता सुनिश्चित गर्न सबै पत्रकारहरूलाई सक्रिय रूपमा सहभागी बन्न आह्वान गरिन्।
यस अघि पीसीएसका महासचिव डीआर दुलालले राज्य स्थापनाको 50औं वर्षगॉंठको अवसरमा प्रेस क्लब र आईपीआर विभागले संयुक्त रूपमा स्वर्ण जयन्ती सम्मेलन ‘सिक्किम@50’ आयोजना गरिरहेको बताए। उनले उक्त कार्यक्रम अधमपुलको स्थानीय एक होटलमा आयोजना गरिने बताएका छन्।