गान्तोक, 10 जुलाई। भारतीय जनता पार्टी सिक्किमका नेतृत्ववर्ग र कार्यकर्ताहरूले आज गुरु पूर्णिमाको पावन अवसरमा राज्यका विभिन्न मठ, मन्दिर, गुम्बा तथा आश्रमहरूको भ्रमण गरे। यस क्रममा टिबेट रोडस्थित भीमादेवी मन्दिरका प्रसिद्ध गुरूजी, देउरालीस्थित छुर्तेन गुम्बाका टुल्कु रिम्पोछे, इञ्चे गुम्बा, रानीपूल नजिक आदिगुरू शंकराचार्य मन्दिरको भ्रमण गरेर पार्टी नेतृत्ववर्गले प्रार्थना साथै श्रद्धेय गुरूहरूप्रति सम्मान जनाएर आशीर्वाद तथा मार्गदर्शन लिए।
भ्रमणको क्रममा सबैले आ-आफ्नो सांस्कृतिक परम्पराअनुसार गुरूहरूलाई सम्मान प्रकट गरेको प्रदेश भाजपा मिडिया प्रभारी निरेन भण्डारीले आज प्रेस विज्ञप्तिमा बताएका छन्। पार्टीका नेताहरूले गुरु पूर्णिमाको सन्देशलाई आत्मसात गर्दै समाजमा सांस्कृतिक, नैतिक तथा आध्यात्मिक मूल्यहरूको संरक्षणप्रति जोड दिए। गुरु पूर्णिमालाई विभिन्न धर्मावलम्बीहरूले आ-आफ्नो परम्परा अनुसार आषाढ महिनाको पूर्णिमा तिथिमा मनाउॅंछन्। यो पर्व गुरुहरूको सम्मान र कदर गर्न समर्पित छ, किनभने गुरुले जीवनमा ज्ञान, नैतिकता र आध्यात्मिक मार्गदर्शन प्रदान गर्छन्।
हिन्दू धर्म अनुसार गुरु पूर्णिमालाई व्यास पूर्णिमा पनि भनिन्छ, किनभने यो दिन महान ऋषि वेदव्यासको जन्मजयन्तीको रूपमा मनाइन्छ। यो दिन गुरु-शिष्य परम्पराको प्रतीकको रूपमा मनाइन्छ। यसैगरी बौद्ध धर्ममा गुरु पूर्णिमा भगवान गौतम बुद्धसँग सम्बन्धित छ। यो दिनलाई बुद्धले आफ्नो पहिलो उपदेश, धम्मचक्र प्रवर्तन, सारनाथमा पञ्चवर्गीय भिक्षुहरूलाई दिनुभएको सम्झनामा मनाइन्छ।
सोही प्रकारले जैन धर्ममा यो पर्व भगवान महावीरको सम्मानमा मनाइन्छ। महावीर स्वामीले आफ्ना शिष्यहरूलाई ज्ञान र मोक्षको मार्ग देखाउनुभएको दिनको रूपमा जैन अनुयायीहरूले आफ्ना गुरुहरूको स्मरण गर्छन्। आजको समयमा गुरु पूर्णिमा केवल धार्मिक गुरुहरूको मात्र नभई शिक्षक, मार्गदर्शक र प्रेरक व्यक्तिहरूको सम्मान गर्ने अवसरको रूपमा पनि लिइन्छ। यो पर्वले हामीलाई हाम्रा गुरुहरूको योगदानको कदर गर्न र जीवनमा सही मार्गमा अघि बढ्न प्रेरित गर्छ।
