लेगसेपको गेमन पुलबाट हाम फालेका दिनेश दासको शव फेला पऱ्यो

गान्तोक, 30 जुलाई। केही दिनअघि पश्चिम सिक्किमको लेगसेपस्थित गेमन पुलबाट आफ्नी सात महिनाकी नाबालिग छोरीसॅंगै कथित हाम फालेका दिनेश दासको शव फेला परेको छ। उनको शव गत आइतवार पिपले ड्याम छेउ रङ्गीत नदी किनारमा भेटिएको पुलिस सूत्रहरूले जानकारी गराएको छ।
पुलिस रिपोर्ट अनुसार, प्रतिकूल भूभाग, कम दृश्यता र बढ्दो नदीको अवस्थाका कारण घटनास्थलमा जॉंच गर्न सकिएन। आफन्तहरूले शव पहिचान गरेपछि नाम्ची जिल्ला अस्पतालको शवगृह पठाइयो। 28 जुलाईका दिन जोरथाङका एसडीएमले दुई जना स्वतन्त्र साक्षीहरूको उपस्थितिमा शव जॉंच गरे। यसपछि, शव पोस्टमार्टमको निम्ति पठाइयो। चिकित्सा-कानूनी औपचारिकताहरू पूरा गरेपछि शव आफन्तहरूलाई हस्तान्तरण गरियो।
प्रारम्भिक जॉंचमा थाहा लागे अनुसार, दिनेश दास मूल रूपमा जयगाउॅं, पश्चिम बंगाल निवासी थिए। उनको विवाह मार्च 2024 मा लेगसेपकी कौशिला शर्मासॅंग भएको थियो। दम्पतिको सात महिनाकी नाबालिग छोरी थिइन्। शुरूमा कौशिला जयगाउॅंमै बस्दै थिइन्। पछि, कथित घरेलू हिंसा र विवादहरूका कारण उनी माइता घरमा आएर बस्न थालिन्।
तर, दिनेश दास पनि उनको पछि लागेर लेगसेप आए र स्थानीय एउटा होटलमा काम गर्ने थाले। कौशिला भने घरमा बसेर नानीको हेरचाह गर्दै थिइन्। तर, कौशिलाले नोकरी खोज्न थालेको कुरालाई लिएर दम्पतिबीच झगडा हुन थाल्यो, किनकि दिनेश कथित यसको विरोधमा थिए।
गत 25 जुलाईका दिन कौशिला, दिनेश, छोरी र सासु आमा लेगसेपस्थित ब्याङ्क गएका थिए। कौशिला र उनकी आमा ब्याङ्कभित्र गएका थिए र दिनेश आफ्नी छोरीसॅंग बाहिर बसेका थिए। ब्याङ्कको काम पूरा गरेर कौशिला बाहिर आइन्, तर दिनेश बाहिर थिएनन्। उनले खोजी गर्दै जॉंदा दिनेश र छोरीलाई गेमन पुलमा भेटाए।
यहॉं पनि दुई जनाबीच कथित कौशिलाको नोकरी गर्ने योजनालाई लिएर विवाद शुरू भयो। यस क्रममा दिनेश आफ्नी सात महिनाकी छोरीलाई लिएर पुलबाट हाम फाले। यसपछि, कौशिलाले तत्काल लेगसेप आउटपोस्टमा घटनाको बारेमा सूचना दिइन्। यस घटनाको सम्बन्धमा 27 जुलाईका दिन मणि कुमार शर्माले जोरथाङ पुलिस थानामा प्राथमिकी दर्ता गराएका थिए। यस घटनाको सम्बन्धमा जॉंच जारी रहेको छ।