गान्तोक, 18 अक्टोबर। हिमालय क्षेत्रका हिमनदी ताल र जल निकायहरूको अनुगमन सम्बन्धी एक बैठक 16 अक्टोबर, 2025 मा राजधानीको भू राजस्व एवं आपदा प्रबन्धन विभागको सम्मेलन हलमा सम्पन्न भयो। बैठकको अध्यक्षता विभागका राहत आयुक्त एवं सचिव एमटी शेर्पाले गरेका थिए। बैठकमा विज्ञान तथा प्रविधि विभाग, केन्द्रिय जल आयोग, सिक्किम राज्य आपदा प्रबन्धन प्राधिकरण (एसएसडीएमए) र जलस्रोत विभागका प्रतिनिधिहरू सहभागी थिए।
बैठकमा केन्द्रिय जल आयोगद्वारा हिमालय क्षेत्रभरि चलिरहेको हिमनदी ताल विस्फोट बाढी (जीएलओएफ) अध्ययन र 2,843 हिमनदी तालहरूको अनुगमनलाई प्रकाश पार्दै प्रस्तुतीकरण गरिएको थियो। छलफलमा हिमनदी तालहरूको जोखिम सूचकांक, अनुगमनका लागि विधिहरू र नदी उपत्यका परियोजनाहरूमा जीएलओएफ जोखिम मूल्याङ्कन गर्न राष्ट्रिय दिशानिर्देशहरूको सन्दर्भ समावेश थिए।
बैठकमा प्रभावकारी योजना र न्यूनीकरणको लागि 1975 देखि उपलब्ध सटीक जलविज्ञान र टेलिमेट्रिक डेटाको महत्त्वमा जोड दिइयो। प्रमुख छलफलहरूमा उच्चतम बाढी स्तर, खतरा स्तर र चेताउनी स्तरको पहिचान, साथै अन्तर-विभागीय डेटा साझेदारी र समन्वय बढाउने आवश्यकतालाई पनि समेटिएको थियो।
राहत आयुक्त एवं सचिवले सिक्किमका जोखिममा रहेका क्षेत्रहरूमा प्रभावकारी अनुगमन, लचिलोपन-निर्माण र जोखिम न्यूनीकरणको लागि सामूहिक प्रयासको महत्त्वमा जोड दिएको एसएसडीएमएले आज विज्ञप्तिमा बताएको छ।
