भिन्न रूपले सक्षम व्यक्तिहरूको प्रतिभा खोज कार्यक्रम ‘झूम इन्टरनेशनल 2025’ भव्यरूपमा सम्पन्न

गान्तोक, 9 नोभेम्बर । भिन्न रूपले सक्षम व्यक्तिहरूका लागि पहिलो पटक आयोजना गरिएको प्रतिभा खोज कार्यक्रम ‘झूम इन्टरनेशनल 2025’ आज गान्तोकको मनन केन्द्रमा भव्यरूपमा सम्पन्न भयो। समावेशिता, आत्मविश्वास र कलात्मक अभिव्यक्तिलाई प्रवर्द्धन गर्ने उद्देश्यले यो विशेष सांस्कृतिक कार्यक्रम भिन्न रूपले सक्षम व्यक्तिहरूका लागि आयोजना गरिएको थियो।
भारतभरिका विभिन्न राज्यका 30 भन्दा बढी सहभागीहरूले फाइनलमा भाग लिएका थिए। प्रतिभागीहरूले नृत्य र गायनदेखि रचनात्मक नाट्य प्रदर्शनसम्मका विविध प्रस्तुतिहरू पेश गरे। शान्तिधाम फाउन्डेशनले एसकेएम सामाजिक सेवा प्रकोष्ठ र सारथीसँगको सहकार्यमा सिक्किम राज्य सहकारी संघ (सिकन) को सहयोगमा आयोजना गरेको यस कार्यक्रममा समाज कल्याण विभागका मन्त्री साम्डुप लेप्चा मुख्य अतिथिको रूपमा उपस्थित रहेका थिए।
आफ्नो सम्बोधनमा मन्त्री साम्डुप लेप्चाले आयोजकहरू एवं सहभागीहरूको प्रेरणादायी प्रदर्शनको प्रशंसा गर्दै दिव्याङ्गजनको उत्थान र सशक्तिकरण गर्ने यस्ता मञ्चहरू प्रदान गर्नुको महत्त्वमा जोड दिए। आयोजकहरूले झूम इन्टरनेशनल केवल एउटा प्रतियोगिता मात्र नभई समाजमा समावेशितालाई प्रवर्द्धन गर्ने आन्दोलन भएको बताए। भविष्यमा यस्ता अवसरहरूलाई निरन्तर विस्तार गर्ने लक्ष्य रहेको बताइएको छ।
कार्यक्रममा गान्तोकका विधायक दिले नामग्याल बर्फुङ्पा, मुख्यमन्त्रीका प्रेस सल्लाहकार बिरेन्द्र तामलिङ, उपमेयर छिरिङ पाल्देन भोटिया लगायत अन्य गणमान्य व्यक्तिहरू पनि उपस्थित थिए।