नाम्चेबुङ र रे-मिन्दुका ३९ परिवार भाजपा प्रवेश

गान्तोक, 27 जून । भारतीय जनता पार्टी (भाजपा) सिक्किममा आज मार्ताम-रुम्तेक तथा नाम्चेबुङ क्षेत्रअन्तर्गत रे-मिन्दु र नाम्चेबुङका ३९ परिवार सामेल भएका छन्। उनीहरूले दुई छुट्टाछुट्टै प्रवेश कार्यक्रममा औपचारिक रूपमा भाजपा प्रवेश गरेका छन्।भाजपा सिक्किमद्वारा जारी प्रेस विज्ञप्ति अनुसार, रे-मिन्दुबाट दावा लेप्चाको नेतृत्वमा २४ परिवार भाजपामा सामेल भएका छन्। रे-मिन्दुमा आयोजित कार्यक्रममा भाजपा सिक्किमका अध्यक्ष डीआर थापाले वरिष्ठ नेता र कार्यकर्ताहरूको उपस्थितिमा पार्टीमा स्वागत जनाए।यसअघि आज बिहान सिच्छे आयोजित एक कार्यक्रममा नाम्चेबुङका १५ परिवारलाई भाजपामा सामेल भए। उनीहरूलाई पनि प्रदेश अध्यक्षथापाले पार्टीमा स्वागत जनाए।नयाँ सदस्यहरूलाई स्वागत गर्दै अध्यक्ष थापाले भाजपाप्रतिको विश्वास व्यक्त गरेकोमा बधाई दिँदै जनकल्याणका लागि सक्रिय रूपमा कार्य गर्न तथा तृणमूल स्तरमा संगठनलाई अझ सुदृढ़ बनाउन आग्रह गरे। उनले प्रधानमन्त्री नरेन्द्र मोदीको नेतृत्वमा भाजपा समावेशी विकास, पारदर्शी सुशासन तथा समाजका सबै वर्गको सेवाप्रति प्रतिबद्ध रहेको बताए।कार्यक्रमलाई सम्बोधन गर्दै थापाले पूर्व मुख्यमन्त्री पवन चामलिङले राजनीतिक उद्देश्यका लागि सिक्किमको तुलना मणिपुरसँग गरेको विषयको आलोचना गरे। उनले मणिपुरले गम्भीर चुनौतीहरू सामना गरे पनि विभिन्न समुदायका नेताहरूको सहकार्यबाट त्यहाँको अवस्था क्रमशः सामान्य बन्दै गएको र विकासले गति लिइरहेको बताए। उनले सिक्किमका राजनीतिक नेतृत्वले अन्य राज्यसँग अनावश्यक तुलना गर्नुको सट्टा राज्यका जनताको आकांक्षा र आवश्यकतामा केन्द्रित हुनुपर्ने बताए। भाजपा-एसकेएम गठबन्धनको विषयमा थापाले सिक्किम र केन्द्र दुवै तहमा गठबन्धन मजबुत रहेको स्पष्ट पारे। पञ्चायत निर्वाचनलाई लिएर भइरहेको अड्कलबाजीलाई अस्वीकार गर्दै उनले निर्वाचन हुन अझ करिब १८ महिना बाँकी रहेकाले गठबन्धनसम्बन्धी कुनै पनि निर्णय उचित समयमा दुवै दलका नेतृत्वले गर्ने बताए। उनले कार्यकर्ता तथा सर्वसाधारणलाई आधारहीन राजनीतिक अड्कलबाजीबाट प्रभावित नहुन आग्रह गरे।कार्यक्रममा जिल्ला अध्यक्ष पेम्पो दोर्जी लेप्चा, नवनियुक्त सदस्य दावा लेप्चा लगायतले पनि मन्तव्य राखे।