गान्तोक, 21 जनवरी । जोरथाङमा चलिरहेको प्रतिष्ठित 71औं माघे संक्रान्ति मेला 2026 मा मंगलवार गोल्डन भोइस अफ सिक्किम, गोल्डन फीट अफ सिक्किम र गोल्डन बिट अफ सिक्किम प्रतियोगिताको ग्राण्ड फिनाले सम्पन्न भयो। सिक्किममा पहिलोपल्ट आयोजित यी प्रतियोगिताहरूले युवाहरूको प्रतिभालाई पोषण गर्ने र उत्सव मनाउने लक्ष्य लिएको मुख्यमन्त्री प्रेमसिंह तामाङले आज सामाजिक सञ्जाल फेसबुक पोस्टमा उल्लेख गरेका छन्।
मुख्यमन्त्रीले यी प्रतियोगिताहरूका सबै विजेता, उप-विजेता र प्रतिभागीहरूलाई हार्दिक बधाई दिएका छन्। उनीहरूका असाधारण प्रतिभा, समर्पण र कडा परिश्रमले साँच्चै उच्च मापदण्ड स्थापित गरेको उनले बताएका छन्।
मुख्यमन्त्रीले सुभाष दर्जी गोल्डन भोइस अफ सिक्किमको उपाधि जित्न सफल बनेको जानकारी गराएका छन्। यसैगरी, सुनिहाङ्गमा सुब्बा प्रथम उपविजेता र सुशिला बाला राई दोस्रो उपविजेता बने।
यसरी नै गोल्डन फीट अफ सिक्किमको उपाधि डायनमिक फ्लिकर्स डान्स एकाडेमीले जित्यो। तपश्री गगन डान्स एकाडेमी प्रथम उपविजेता र डेमाजोङ ट्राइब डान्स एकाडेमी दोस्रो उपविजेता बने।
यसै क्रममा, माना ब्याण्डले गोल्डन बिट अफ सिक्किमको उपाधि जितेको छ। यस प्रतियोगितामा रोल हेड्स ब्याण्ड प्रथम उपविजेता र अखण्ड ब्याण्ड दोस्रो उपविजेता बनेका छन्।
मुख्यमन्त्रीले यी प्रतियोगिताहरूमा प्रत्यक्ष र अप्रत्यक्ष रूपमा संलग्न कलाकारहरूको प्रयासको पनि सराहना गरेका छन्। उनले सिक्किम सरकार युवाहरूको समर्थनमा सधैं दृढ़तापूर्वक उभिएको छ र भविष्यमा पनि समर्थन गरिरहने प्रतिबद्धता प्रकट गरेका छन्। उनले यी प्रतियोगिताहरू केवल कार्यक्रमहरू मात्र होइनन्, ठूला राष्ट्रिय र अन्तरराष्ट्रिय मञ्चहरूको लागि तयारी रहेको बताएका छन्।
उनले सरकारको प्रतिबद्धता भनेको युवा प्रतिभाहरूलाई प्रोत्साहन, मार्गदर्शन र सशक्त बनाउनु रहेको बताएका छन्, ताकि उनीहरू देश र विश्वभरका ठूला मञ्चहरूमा आत्मविश्वासका साथ प्रतिस्पर्धा गर्न र चम्कन सकून्। मुख्यमन्त्रीले सहभागीहरूलाई ध्यान केन्द्रित गर्न, कडा परिश्रम गर्न र उत्कृष्टताको लागि प्रयास जारी राख्न आग्रह गरेका छन्।
