ब्राउन शुगरसहित एक तस्कर पक्राउ, सदर पुलिसद्वारा सहयोगका लागि अनुरोध

गान्तोक, 01 फरवरी । सदर पुलिसले नशा तस्करी विरुद्ध आफ्नो कारबाहीलाई तीव्र पारेको छ। यस क्रममा पुलिसले एक व्यक्तिलाई नशा तस्करीको आरोपमा पक्राउ गरेको छ। पक्रा पर्ने व्यक्तिको नाम सुमित राई बताइएको छ। 28 वर्षीय आरोपी कालेबुङको कुमाई निवासी हुन् भने हाल देवरालीमा बस्दै आएका छन्।
सदर पुलिसले विश्वसनीय सूत्रहरूका आधारमा आरोपी व्यक्ति सुमित राईलाई 35.23 ग्राम ब्राउन शुगरको साथमा पक्राउ गरेको बताइएको छ। जफत गरिएका नशालु पदार्थलाई कानूनी कारबाहीका लागि नियन्त्रणमा लिइएको छ। आरोपी विरुद्ध सदर थानामा एनडीपीएस एक्ट अन्तर्गत मामिला दर्ता गरिएको छ। साथै, तस्करीको स्रोत पत्ता लगाउन र लागूऔषध आपूर्ति श्रृंखलासँग सम्भावित लिङ्कहरू पहिचान गर्न जॉंच शुरू गरिएको जनाइएको छ।
सदर पुलिसले समाज, विशेष गरी युवाहरू, लाई लागूपदार्थको खतराबाट जोगाउने आफ्नो प्रतिबद्धता दोहोर्‍याउँदै लागूपदार्थको ओसारपसारसँग सम्बन्धित कुनै पनि जानकारी साझा गरेर सहयोग गर्न नागरिकहरूलाई आग्रह गरेको छ।