सुकान्त दास भारतीय ब्याडमिन्टन दलको प्रबन्धक मनोनित भएकोमा बीएएसले दियो बधाई

गान्तोक, 08 फरवरी। ब्याडमिन्टन एसोसिएशन अफ् सिक्किम (बीएएस) का महासचिव सुकान्त दास नेदरल्याण्ड र जर्मनीमा आयोजना हुने दुई प्रमुख अन्तरराष्ट्रिय जुनियर ब्याडमिन्टन प्रतियोगिताहरूका लागि भारतीय दलका प्रबन्धकका रूपमा मनोनित भएका छन्। बीएएसले सुकान्त दासलाई सफल र अविस्मरणीय अभियानको लागि हार्दिक बधाई एवं शुभकामना दिएको छ।
बीएएसले आज जारी प्रेस विज्ञप्तिमा भनेको छ, 25 फरवरीदेखि 1 मार्च, 2026 सम्म नेदरल्याण्डमा आयोजना हुने ‘डच जुनियर इन्टरनेशनल ग्रान्ड प्रिक्स’ र ४ देखि ८ मार्च, २०२६ सम्म जर्मनीमा हुने ‘जर्मन जुनियर इन्टरनेशनल ग्रान्ड प्रिक्स’ को लागि बीएएसका महासचिव सुकान्त दासलाई भारतीय टोली प्रबन्धकको रूपमा मनोनित गरिएको छ। यो सम्मानित जिम्मेवारी भारतीय ब्याडमिन्टन संघका अध्यक्षले उनलाई राज्य तथा राष्ट्रिय स्तरमा ब्याडमिन्टनको विकास र प्रवर्द्धनमा उनको समर्पण, गतिशील नेतृत्व र उत्कृष्ट योगदानको कदर गर्दै प्रदान गरेको बीएएसले बताएको छ।
बीएएसले अझ भनेको छ, सुकान्त दासको मनोनयन सम्पूर्ण सिक्किम ब्याडमिन्टन समुदायको लागि ठूलो सम्मानको क्षण हो। उनको सक्षम मार्गदर्शन, अनुशासित व्यवस्थापन र प्रेरणादायी नेतृत्वमा भारतका शीर्ष जुनियर शटलरहरूले अन्तरराष्ट्रिय मञ्चमा राष्ट्रको प्रतिनिधित्व गर्नेछन्। उनको नियुक्तिले व्यक्तिगत उत्कृष्टता मात्र नभई भारतीय ब्याडमिन्टनमा सिक्किमको अर्थपूर्ण योगदानको बढ्दो मान्यतालाई पनि प्रतिबिम्बित गर्दछ।