भारतीय सेनाद्वारा पूर्व सिक्किमको उच्च हिमाली क्षेत्रमा फसेका पर्यटकहरू उद्धार

गान्तोक, 23 फरवरी । सिक्किमका उच्च हिमाली क्षेत्रहरूमा शनिबार र आइतबार हिमपात भयो। अचानक भएको हिमपातका कारण आइतबार पूर्व सिक्किमका उच्च हिमाली क्षेत्रहरूमा घुम्न गएका पर्यटकहरू फस्न पुगे। फसेका पर्यटकहरूलाई भारतीय सेनाद्वारा उद्धार गरिएको छ।भारतीय सेनाका पीआरओले आज जारी प्रेस विज्ञप्तिमा बताए अनुसार, 22 फरवरीका दिन भएको भारी हिमपातका कारण पूर्व सिक्किमका उच्च हिमाली क्षेत्रहरूमा फसेका पर्यटकहरू र स्थानीय मानिसहरूको उद्धार गर्न भारतीय सेनाका जवानहरूले अपरेशन हिमराहत अन्तर्गत उद्धार अभियान चलायो। अचानक परेको बाक्लो हिमपात र शून्यभन्दा तल झरेको तापक्रमका कारण संवेदनशील सड़क खण्डहरूमा धेरै पर्यटकका सवारी साधनहरू फसेका थिए, जसका कारण उनीहरू कठोर मौसमको जोखिममा पर्न पुगे। भारतीय सेनाका जवानहरू तत्काल प्रभावित क्षेत्रमा पुगे र राहत तथा उद्धार कार्य शुरु गरे।यस क्रममा कुल ४६ जना पर्यटकहरूलाई सुरक्षित रूपमा उद्धार गरी नजिकको सेना शिविरमा स्थानान्तरण गरिएको सेनाले बताएको छ। शिविरमा पर्यटकहरूलाई स्वास्थ्य जाँच, न्यानो आश्रय, तातो खाना तथा आवश्यक राहत सामग्री उपलब्ध गराइएको थियो, जसले अत्यधिक चिसो र उच्च भू-भागसँग सम्बन्धित समस्याबाट जोगाउन सहयोग पुर्यायो। यसैगरी, चिकित्सा टोलीले सबै उद्धार गरिएका व्यक्तिहरूको अवस्था स्थिर रहेको सुनिश्चित गरेको थियो। यस अतिरिक्त, पर्यटकहरूको उद्धारसँगै सेनाले १५० भन्दा बढी पर्यटक सवारी साधनहरूलाई सुरक्षित स्थानतर्फ व्यवस्थित रूपमा पुर्याउने कार्य पनि गरेको थियो। यस समन्वित प्रयासले यातायात व्यवस्थापनका साथै उच्च हिमाली क्षेत्रमा थप जोखिम न्यूनीकरण गर्न महत्वपूर्ण भूमिका खेलेको बताइएको छ।यस अभियानले दुर्गम तथा चुनौतीपूर्ण भू-भागमा मानवीय सहायता तथा आपदा प्रतिक्रियाप्रति भारतीय सेनाको निरन्तर प्रतिबद्धतालाई झल्काएको विज्ञप्तिमा उल्लेख छ। अपरेशन हिमराहत अन्तर्गत चलाईएको अभियानले प्रभावित क्षेत्रमा सुरक्षा सुनिश्चित गर्दै आवागमन पुनः सुचारु गर्न र खराब मौसमका कारण अवस्था जटिल हुनबाट जोगाउन सफल भएको बताइएको छ।