गेजिङ ओमचुङ जीपीयूलाई प्रतिष्ठित दीनदयाल उपाध्याय पञ्चायत सतत विकास पुरस्कार

गान्तोक, 31 मार्च। गेजिङ जिल्ला अन्तर्ग​त गेजिङ ओमचुङ ग्राम पञ्चायत एकाईले गरिबीमुक्त र उत्तम जीविकोपार्जनको लागि राष्ट्रिय मान्यता प्राप्त गरेको छ। भारत सरकारको पञ्चायति राज मन्त्रालयले वर्ष 2025 का लागि ‘गरिबीमुक्त र उत्तम जीविकोपार्जन पञ्चायत’ विषयमा गेजिङ ओमचुङ ग्राम पञ्चायत एकाई (जीपीयू) लाई प्रतिष्ठित दीनदयाल उपाध्याय पञ्चायत सतत विकास पुरस्कार प्रदान गर्ने घोषणा गरेको छ। पञ्चायतले राष्ट्रिय स्तरमा तेस्रो स्थान हासिल गरेको छ, जुन सिक्किमका जनताको लागि गर्वको क्षण हो।
गेजिङ ओमचुङ जीपीयूले भनेको छ, यो पुरस्कार जीविकोपार्जन अभिवृद्धि, गरिबी निवारण र दिगो ग्रामीण विकासमा पञ्चायतको अनुकरणीय पहलहरूको प्रमाण हो। यसले एक लचिलो र प्रगतिशील समाज निर्माणमा पञ्चायत नेतृत्व, समुदायका सदस्यहरू र सहयोगी संस्थाहरूको सामूहिक प्रतिबद्धतालाई प्रतिबिम्बित गर्दछ। गेजिङ ओमचुङ जीपीयूले मुख्यमन्त्री प्रेमसिंह तामाङ, पञ्चायति राज मन्त्री र विभाग, क्षेत्र विधायक र जिल्लाका सबै विभागहरूलाई दूरदर्शी नेतृत्व, प्रोत्साहन, मार्गदर्शन र समर्थनको लागि धन्यवाद दिएको छ। यसरी नै जीपीयूले गेजिङ ओमचुङका जनतालाई पनि उनीहरूको सक्रिय सहभागिता र सामूहिक भावनाको लागि धन्यवाद दिएको छ।
गेजिङ ओमचुङ जीपीयूले यो मान्यता गेजिङ ओमचुङ जीपीयूको लागि मात्र उत्सव नभई राज्य र राष्ट्रभरिका अन्य पञ्चायतहरूलाई ग्रामीण विकासको लागि नवीन, जनकेन्द्रित दृष्टिकोण अपनाउन प्रेरणा पनि रहेको बताएको छ।