१० अगस्तको कार्यक्रमलाई लक्षित गर्दै सिङ्ताम-रम्फू जोड्ने समरदुङ सडकको मर्मत कार्य जारी

गान्तोक, 08 अगस्त। आगामी १० अगस्तमा रम्फू खेल मैदानमा आयोजना हुन लागिरहेको दोस्रो आमा सम्मान दिवस तथा ९औँ जन उन्मुक्ति दिवसलाई ध्यानमा राख्दै सिङ्तामलाई रम्फूसँग जोड्ने समरदुङ सड़कको मर्मत तथा सुधार कार्य तीव्र रूपमा भइरहेको छ। सहज तथा सुरक्षित यातायात सुनिश्चित गर्न सडकको अवस्था सुधार गर्ने उद्देश्यले मर्मत कार्य अघि बढाइएको छ। सडक तथा पुल विभागका मन्त्री एनबी दाहालको निर्देशनअनुसार आज सड़क तथा पुल विभागका विधायक तथा सल्लाहकार इरुङ तेन्जिङ लेप्चाले सिङ्तामदेखि रम्फूसम्मको समरदुङ सडकखण्डको स्थलगत निरीक्षण गरे। निरीक्षणका क्रममा मुख्यमन्त्रीका राजनीतिक सचिव बिकास बस्नेत, विभागीय अधिकारीहरू तथा सरकारी ठेकेदारहरू भाइचुङ भोटिया र बासु शर्मा पनि उपस्थित थिए।मर्मत कार्यअन्तर्गत सड़कका विभिन्न क्षतिग्रस्त तथा हिलोयुक्त क्षेत्रमा आवश्यक मेटल सामग्री हालेर सडकको सतह सुधार गरिनेछ। उक्त कार्यलाई प्रभावकारी रूपमा सञ्चालन गर्न भोलि सडकमा सवारीसाधन आवागमन पूर्ण रूपमा बन्द गरिनेछ। यस अवधिमा विभाग तथा कामदारहरूले मेटल सामग्री र रोलरको प्रयोग गरी आवश्यक मर्मत तथा समतलीकरण कार्य गर्नेछन्।निरीक्षण टोलीले सिङ्तामदेखि रम्फूसम्मको सम्पूर्ण सडकखण्डको अवस्था मूल्याङ्कन गर्दै तत्काल मर्मत आवश्यक पर्ने क्षेत्रहरू पहिचान गरेको छ। आगामी कार्यक्रमका क्रममा सहज यातायात सञ्चालन सुनिश्चित गर्न सडकको सतह सुधार तथा मर्मत कार्यलाई प्राथमिकताका साथ अघि बढाइनेछ।विभागको निर्देशनअनुसार, १० अगस्तमा प्रस्तावित एकतर्फी यातायात व्यवस्थालाई सहज बनाउन समेत यो सडक मर्मत पहल गरिएको हो। सडक मर्मत कार्यका कारण भोलि सवारीसाधनका लागि सडक बन्द रहने बताइएको छ।