नेपालको बाढीपछि फसेका सिक्किमका आठै जना नागरिक सकुशल घर फर्किए

गान्तोक, सेप्टेम्बर 2026। नेपालको भोटेकोशी नदीमा २६ अगस्त, २०२६ मा आएको आकस्मिक बाढीपछि केही समय फसेका सिक्किमका सबै आठ जना नागरिक सकुशल सिक्किमस्थित आफ्ना घर आइपुगेका छन्। नेपाल फ्ल्यास फ्लड टास्क फोर्स, सिक्किम सरकारले आज जारी प्रेस विज्ञप्तिमा उक्त जानकारी गराएको छ।
विज्ञप्तिका अनुसार, प्रभावित आठ जना सिक्किमवासीमा सुरेश कुमार अग्रवाल, आशा देवी अग्रवाल, सुरेन्द्र कुमार अग्रवाल, चित्रा देवी अग्रवाल, भावरलाल अग्रवाल, पुष्पा देवी अग्रवाल, धनमाया छेत्री र सावित्री छेत्री रहेका छन्। गान्तोक र गेजिङ जिल्लाबाट कैलाश मानसरोवर यात्रामा गएको तीर्थयात्री समूहका सदस्यहरू चीनको तिब्बत स्वायत्त क्षेत्रमा पर्ने सागा काउन्टीमा फसेका थिए।
यसबारे जानकारी प्राप्त भएपछि सिक्किम सरकारले समूहको अवस्था निगरानी गर्न तथा उनीहरूलाई सुरक्षित रूपमा फर्काउन सम्बन्धित केन्द्रिय निकायहरूसँग समन्वय गर्न तत्काल नेपाल फ्ल्यास फ्लड टास्क फोर्स गठन गरेको थियो। मुख्यमन्त्रीले शुरुदेखि नै यस विषयमा व्यक्तिगत रूपमा हस्तक्षेप गरेका थिए। विपद्को जानकारी प्राप्त भएको एक दिनभित्रै २७ अगस्त, २०२६ मा उनले फसेका समूहसँग प्रत्यक्ष टेलिफोन सम्पर्क गरी उनीहरूको सुरक्षा तथा अवस्थाबारे जानकारी लिएका थिए। यस विषयलाई भारत सरकारको विदेश मन्त्रालयसँग पनि एकैसाथ उठाइएको विज्ञप्तिमा उल्लेख छ।
मुख्यमन्त्रीका जनसम्पर्क अधिकारी समूहको कैलाश मानसरोवर यात्रा कार्यक्रम सञ्चालन गर्ने भ्रमण सञ्चालकसँग प्रत्यक्ष र निरन्तर सम्पर्कमा रहेका थिए। यसमार्फत समूहको स्थान र आवागमनबारे विश्वसनीय तथा प्रत्यक्ष जानकारी प्रत्येक चरणमा राज्य सरकारलाई उपलब्ध गराइएको थियो। राज्य सरकारले सम्बन्धित भ्रमण सञ्चालक तथा अन्य सरोकारवालाहरूले गरेको समन्वयात्मक सहयोगप्रति आभार व्यक्त गरेको छ।
सिक्किम सरकारले गठन गरेको नेपाल फ्ल्यास फ्लड टास्क फोर्सका सहायता नम्बरहरू चौबीसै घण्टा सञ्चालनमा रहेको जनाइएको छ। नेपालमा आफ्ना परिवारका सदस्य हराइरहेका, फसेका वा अन्य कुनै रूपमा प्रभावित भएका सिक्किमवासीलाई तत्काल सहयोगका लागि टास्क फोर्समा सम्पर्क गर्न आग्रह गरिएको छ।
नेपाल फ्ल्यास फ्लड टास्क फोर्स सहायता नम्बर:एसएसडीएमए नियन्त्रण कक्ष/आपत्कालीन सञ्चालन केन्द्र:०३५९२-२०११४५, २०२४६१, २०५२५६