नरबहादुर भण्डारी कलेजमा देवकोटा जयन्ती पालन

गान्तोक, १२ नोभेम्बर: “विश्वसाहित्यका सन्दर्भमा लक्ष्मीप्रसाद देवकोटाभन्दा ठुलो अर्को नेपाली प्रतिनिधि आजसम्म छैन।” यो उद्‌गार डा टेकबहादुर छेत्रीको हो। उनी आज नरबहादुर भण्डारी सरकारी महाविद्यालय तादोङमा नेपाली विभागद्वारा आयोजित महाकवि लक्ष्मीप्रसाद देवकोटाको ११५औँ जन्मजयन्ती समारोहमा बोल्दै थिए।
पहिलोचोटि कलेजमा आयोजन गरिएको देवकोटा जयन्ती समारोहको सभाध्यक्ष विभागकी सह-प्राध्यापक डा गीता निरौला रहेकी थिइन्। आफ्नो सम्बोधनमा डा निरौलाले प्रत्येक नेपाली साहित्यका विद्यार्थी तथा सर्जक अनि जनमानसले देवकोटाले देखाएको दर्शन अनुसरण गरी र ज्ञानबाट लाभान्वित हुनसके सफलता सम्भाव्य छ भनिन्। उनले देवकोटाले उन्नाइसौँ शताब्दीका प्रायः सबै उत्कृष्ट साहित्यको अध्ययन गरेको उल्लेख पनि गरिन्। देवकोटाका धेरैजसो कृतिहरू नेपाली जीवनको प्रतिच्छाया रहेको र त्यसबाट शिक्षा लिई सुन्दर, सम्पन्न र प्रसन्नचित्तयुक्त समाजको निर्माण गर्न सकिने विचार पनि व्यक्त गरिन्।
विभागाध्यक्ष डा उदय छेत्रीले कार्यक्रममा स्वागत सम्बोधन राख्दै देवकोटाबारे धेरैवटा रोचक प्रसङ्गहरू प्रस्तुत गरे। देवकोटालाई गरिब भनी जुन प्रकारले प्रस्तुत गरिन्थ्यो, वास्तवमा त्यसो नभएर देवकोटा निकै सम्भ्रान्त रहेको पनि उनले बताए। डा छेत्रीले लक्ष्मीप्रसाद देवकोटा नेपाली साहित्यका एकजना शीर्षस्थ व्यक्तित्व रहेको र उनको जन्मजयन्ती मनाएर उनलाई श्रद्धा-सुमन जनाउनु सबैको कर्तव्य रहेको भए तापनि तिथिका आधारमा मनाउँदा चाडपर्व पर्नजाने हुँदा बिस्तारै देवकोटा ओझेल पर्ने बुझेर देवकोटाको जन्म मिति १२ नोभेम्बरलाई नै उचित ठानी यो कार्यक्रम गर्ने निर्णय गरेको बताए। यो पहलका निम्ति विशेषगरी डा टेकबहादुर छेत्रीको सक्रियता सराहनीय रहेको बताए। अबउसो बर्सेनी १२ नोभेम्बरलाई देवकोटा जयन्तीका रूपमा पालन गरिने पनि उनले कार्यक्रममा बताए। उनले विद्यार्थीको सक्रिय सहभागिताको मुग्धकण्ठले प्रशंसा गर्दै यसले नेपाली भाषा-साहित्यको उज्ज्वल भविष्य रहेको विचार राखे।
कार्यक्रममा विभागका सहायक प्राध्यापक डा टेकबहादुर छेत्रीले विशेष वार्ता प्रस्तुत गर्दै लक्ष्मीप्रसाद देवकोटालाई विश्वकै एकजना सशक्त साहित्यिक व्यक्तित्वका रूपमा विद्यार्थीहरूमाझमा परिचय गराउने ध्येयका साथ देवकोटाका सृजनाहरूमा विश्वजनीन विषयवस्तु, दर्शन र शिल्पशैली रहेको प्रसङ्ग सोदाहरण प्रस्तुत गरे। नेपाली जाति र हिमाली संस्कृतिका कतिपय विषयहरू लेख्न सकिएको छैन भन्ने देवकोटाको उद्‌गार साझा गर्दै डा छेत्रीले देवकोटाले साहित्यका सबै विधाहरूमा नेपाली जीवन, दर्शन र दृष्टि पनि पस्केको उल्लेख गरे।
नेपाली साहित्याकाशमा अनेकौँ अमूल्य निधिका सृजनाहरू रहे तापनि वैश्विकस्तरमा देवकोटाका सृजना र कृतिहरू प्रतिनिधिका रूपमा धेरै उच्च कोटीका रहेको र यो ‘बाह्यज्ञानार्थं आङ्लं, आत्मज्ञानाय संस्कृतम्’-द्वारा घटित भएको प्रत्यक्ष अनुभव गर्न सकिने बताए।
महाकवि लक्ष्मीप्रसाद देवकोटाको रेखाचित्र रहेको फ्रेममा खदा अर्पण गरी प्रारम्भ भएको यस कार्यक्रममा नेपाली विभागका सहायक प्राध्यापक चन्द्रप्रकाश राई, डा शारदा छेत्रीलगायत नेपाली सम्मानका पहिलो, तेस्रो र पाँचौँ सत्रका विद्यार्थीहरूको सक्रिय सहभागिता रहेको थियो। पाँचौँ सत्रकी विद्यार्थी पूजा छेत्रीले धन्यवाद ज्ञापन प्रस्तुत गरेकी थिइन् र कार्यक्रमको सञ्चालन अस्मिता शर्माले गरेको विभागाध्यक्ष डा उदय छेत्रीले प्रेस विज्ञप्तिमार्फत जनाएका छन्।