गान्तोक, 09 जुलाई। चेयरपर्सन र ओएसडीका रूपमा हालैमा नियुक्ति पाएका स्वयं सहायता समूहका 12 जना पदाधिकारीहरूले मुख्यमन्त्री प्रेमसिंह तामाङलाई धन्यवाद दिएका छन्। सिक्किम सरकारले विभिन्न विभाग, बोर्ड र संगठनहरूमा एसएचजीका पदाधिकारीहरूलाई चेयरपर्सन र आएसडी नियुक्त गरेको छ।
राजधानीमा आज आयोजित एक पत्रकार सम्मेलनमा पीएचई विभागको चेयरपर्सनको रूपमा नियुक्ति पाएकी छुमिला भोटियाले यस नियुक्तिलाई वर्तमान सरकारको प्रगतिशील पहल बताउॅंदै सम्पूर्ण एसएचजी सदस्यहरूको तर्फबाट मुख्यमन्त्री प्रेमसिंह तामाङलाई धन्यवाद दिइन्। मुख्यमन्त्रीले मार्च 2024 मा जोरथाङमा आयोजित सम्मेलनमा एसएचजीका सदस्यहरूलाई पनि चेयरपर्सन अथवा सल्लाहकार बनाउने घोषणा गरेका थिए भन्दै आज मुख्यमन्त्रीले आफ्नो वचन पूरा गरेको बताइन्।
उनले यो नियुक्ति एसएचजीका 12 जना सदस्यहरूको मात्र होइन, तर एसएचजीसॅंग सम्बद्ध 55 हजार महिलाहरूको नियुक्ति रहेको ठहर पनि गरेकी छिन्। यो नियुक्तिले इतिहास कायम गरेको दाबी गर्दै उनले यो सम्मान एसएचजीमा संलग्न राज्य अनि देशका करोडौं महिलाहरूले पाएको सम्मान हो भनिन्।
चेयरपर्सन भोटियाले 2019 मा एसकेएम पार्टीको सरकार गठन भएपछि मात्र एसएचजीहरू सक्षम र वित्तीय रूपमा स्वतन्त्र बनेको दाबी गरिन्। उनले यो नियुक्तिलाई आफूहरूले जिम्मेवारीका रूपमा लिएको र यस जिम्मेवारीलाई इमान्दारीपूर्वक निर्वहन गर्ने प्रतिबद्धता व्यक्त गरेकी छिन्।
