एसडीएफ पार्टीको नाम्ची-सिङ्गिथाङ समष्टिस्तरीय समिति गठन

गान्तोक, 06 अगस्त।सिक्किम डेमोक्रेटिक फ्रन्ट (एसडीएफ) पार्टीको नाम्ची-सिङ्गिथाङ क्षेत्रीय संगठन सुदृढीकरण तथा विस्तार सम्बन्धी एक बैठक आज पार्टीकी केन्द्रिय उपाध्यक्ष कृष्ण तामाङको अध्यक्षतामा सम्पन्न भयो। बैठकमा क्षेत्रीय संगठनलाई अझ सशक्त, प्रभावकारी तथा जनमुखी बनाउने विषयमा विस्तृत छलफल गरिएको र विभिन्न पदमा पदाधिकारीहरू चयन गरिएको बताइएको छ।एसडीएफद्वारा आज जारी एक प्रेस विज्ञप्ति अनुसार, समष्टिस्तरीय संगठन संयोजक रत्न बहादुर राई, समष्टिस्तरीय समिति अध्यक्ष विकास राई, उपाध्यक्ष दावा ग्याल्मो भोटिया र विशाल राई, महासचिव बिमल राई, प्रचार–प्रसार सचिव एलबी छेत्री तथा एमबी गुरुङ र रमेश किरात सल्लाहकार चयन गरिएका छन्।सभालाई सम्बोधन गर्दै पार्टीकी जिल्ला समिती उपाध्यक्ष कृष्ण तामाङले एसडीएफ नै सिक्किम र सिक्किमेली जनताको हित, अधिकार तथा पहिचानको संरक्षणका लागि प्रतिबद्ध पार्टी भएको बताए। उनले सिक्किमेली जनताले समयमै आफ्नो हितको पक्षमा उभिने राजनीतिक शक्तिलाई सही रूपमा पहिचान गरी समर्थन गर्नुपर्ने आवश्यकता औँल्याउँदै भविष्यप्रति सबैलाई सचेत रहन आग्रह गरे।बैठकमा उपस्थित जिल्ला नेतृत्वले नवचयनित पदाधिकारीहरूलाई हार्दिक बधाई तथा सफल कार्यकालको शुभकामना व्यक्त गर्दै संगठनलाई गाउँ-गाउँसम्म सुदृढ़ बनाउन, जनतासँग निरन्तर सम्पर्क विस्तार गर्न तथा पार्टीका सिद्धान्त, नीति र कार्यक्रमलाई प्रभावकारी रूपमा कार्यान्वयन गर्न आह्वान गरे।बैठकमा सहभागीहरूले संगठनलाई अझ सुदृढ़ र सक्रिय बनाउँदै आगामी राजनीतिक गतिविधिहरूलाई एकताबद्ध रूपमा अघि बढाउने दृढ़ प्रतिबद्धता व्यक्त गरेको बताइएको छ