केन्द्रिय रक्षा राज्यमन्त्रीले गान्तोक-जीमा सड़क परियोजनाको गुणस्तर निरीक्षणको आश्वासन दिए

गान्तोक, 09 मार्च। सिक्किमका लोकसभा सांसद इन्द्रहाङ सुब्बाले सिक्किममा प्रस्तावित गान्तोक-जीमा सडक परियोजनाको सम्बन्धमा केन्द्रिय रक्षा राज्यमन्त्री संजय सेठबाट औपचारिक पत्र प्राप्त गरेका छन्, जसमा सांसदले उठाएको मामिलाको जॉंच गरिएको कुरा उल्लेख छ। उक्त जानकारी आज जारी एक विज्ञप्तिमा दिइएको छ।
विज्ञप्तिका अनुसार, सांसद इन्द्रहाङ सुब्बाले 27 फरवरी, 2026 मा केन्द्रिय रक्षा राज्यमन्त्री समक्ष गान्तोक-जीमा सडक परियोजनाको मामिला उठाएका थिए। मन्त्रालयले गान्तोक-जीमा सडक परियोजनाको कार्यान्वयन एक सक्षम परियोजना व्यवस्थापन परामर्श र अथोरिटी इन्जिनियरद्वारा उपयुक्त प्राविधिक निरीक्षणको साथ गरिने आश्वासन दिएको छ।
पत्रमा प्रस्तावित सुरक्षित, स्थिर र पर्यावरणीय रूपमा जिम्मेवार सडक सुनिश्चित गर्ने उद्देश्यले अलाइनमेन्टका साथै भूगर्भीय र भू-आकृतिगत पक्षहरूलाई विस्तृत परियोजना प्रतिवेदनको तयारीको क्रममा सावधानीपूर्वक समावेश गरिने बताइएको छ। यसैगरी, गुणस्तर, दिगोपन र न्यूनतम पर्यावरणीय प्रभाव सुनिश्चित गर्न आवश्यक न्यूनीकरण उपायहरू पनि अपनाइने आश्वासन दिइएको छ।
सांसद डा. सुब्बाले यस विषयलाई मन्त्रालयले तुरुन्तै विचार गरेकोमा आभार व्यक्त गरेका छन्। उनले पर्यावरणीय प्रभावलाई न्यूनीकरण गर्दै उच्च निर्माण मापदण्ड कायम राख्नु कमजोर हिमालय क्षेत्रको लागि अत्यन्त महत्त्वपूर्ण रहेको बताएका छन्। उनले सिक्किममा सुरक्षित, दिगो र क्षेत्रको पारिस्थितिक सन्तुलनप्रति संवेदनशील पूर्वाधार विकासको लागि वकालत जारी राख्ने आफ्नो प्रतिबद्धतालाई पनि पुन: पुष्टि गरेका छन्।