नाम्ची जिल्लाका पूर्व भाजपा अध्यक्ष सहित 10 परिवार एसकेएम पार्टीमा सामेल

गान्तोक, 26 जून । बर्फुङ निर्वाचन क्षेत्रमा भाजपा र एसडीएफ छाडेर 10 परिवार एसकेएममा औपचारिक रूपमा प्रवेश गरेका छन्। नवनियुक्त सदस्यहरूलाई एसकेएम ठेकेदार प्रकोष्ठका उपाध्यक्ष प्रभारी टासी ग्याल्पो भोटियाको निवासमा आयोजित कार्यक्रममा पार्टीमा स्वागत गरियो।
कार्यक्रममा बर्फुङका विधायक रिक्सल दोर्जी भोटिया, मुख्यमन्त्रीका अतिरिक्त राजनीतिक सचिव विष्णु शर्मा, विधायकका ओएसडी शिवकुमार राई, सीएलसी बर्फुङका अध्यक्ष नारायण गोपाल गुरुङ लगायत पार्टीका नेता तथा कार्यकर्ताहरूको उपस्थिति रहेको थियो।
एसकेएममा प्रवेश गर्नेहरूमा नाम्ची जिल्लाका पूर्व भाजपा अध्यक्ष सीएल गुरुङ, राज्य महिला आयोगकी पूर्व सदस्य रीता राई, पूर्व पञ्चायत सदस्य भीमकुमार राई र भानु राई, अवकाशप्राप्त स्वास्थ्य कर्मचारी लालमान राई अनि टीएम राई, अवकाशप्राप्त शिक्षक यूएम राई साथै मानसिंह राई, लक्ष्मण राई र विमल राई रहेका छन्।
नयाँ सदस्यहरूले मुख्यमन्त्री प्रेमसिंह तामाङको नेतृत्वमा राज्यमा भएको विकास, जनमुखी शासन प्रणाली तथा दूरदर्शी नेतृत्वबाट प्रभावित भएर एसकेएम रोजेको बताएका छन्। उनीहरूले आगामी दिनहरूमा पार्टीलाई थप सशक्त बनाउन सक्रिय भूमिका निर्वाह गर्ने प्रतिबद्धता जनाएका छन्।