गान्तोक, 12 जुलाई। सिक्किमका एक वरिष्ठ साहित्यकार तथा पद्मश्रीले सम्मानित सानु लामाको शनिवार बिहान सिलगढीको स्थानीय एक निजी अस्पतालमा निधन भयो। वरिष्ठ साहित्यकार लामाको निधनमा सिक्किमका राज्यपाल र मुख्यमन्त्री लगायत विभिन्न राजनीतिक दलहरूले शोक-समवेदना प्रकट गरेका छन्।
सिक्किमका राज्यपाल ओम प्रकाश माथुरले आज जारी आफ्नो शोक सन्देशमा वरिष्ठ साहित्यकार सानु लामाको निधनको समाचार सुनेर अत्यन्त दु:खित बनेको बताएका छन्। उनले सानु लामाको निधनलाई साहित्य जगत र सिक्किमका मानिसहरूका लागि अपूरणीय क्षति बताएका छन्। उनले शोकसन्तप्त परिवारप्रति गहिरो समवेदना व्यक्त गर्दै दिवंगत आत्माको शान्तिको लागि प्रार्थना गरेका छन्।
मुख्यमन्त्री प्रेमसिंह तामाङले वरिष्ठ साहित्यकार सानु लामाको निधनमा गहिरो शोक व्यक्त गर्दै सानु लामाको नेपाली भाषा, साहित्य र सांस्कृतिक चेतनाको संवर्द्धनमा समर्पित जीवनले हामी सबैको मनमा गहिरो छाप छोडेको बताएका छन्। उहाँको सृजनात्मक प्रतिभा, गीतात्मक सौन्दर्य, र नेपाली साहित्यप्रतिको समर्पणले सिक्किमको साहित्यिक परम्परालाई समृद्ध बनाउँदै राष्ट्रियस्तरमै गौरव बढाएको छ। उनले सिक्किम राज्यको मात्र नभएर साहित्यिक जगतमा यो एउटा अपूरणीय क्षति हो भन्दै उहाँको विरासतले भावी पुस्ताहरूलाई सदा प्रेरित गरिरहनेछ भनेका छन्।
भारतीय जनता पार्टी सिक्किमले पद्मश्री पुरस्कारले सम्मानित एक वरिष्ठ साहित्यकार सानु लामाको निधनमा गहिरो शोक व्यक्त गर्दै हार्दिक श्रद्धाञ्जलि व्यक्त गरेको छ। भाजपा सिक्किमले एक युगको अन्त्य भएको बताउॅंदै ईश्वरले उहाँको पवित्र आत्मालाई चिरशान्ति प्रदान गरून् भनी प्रार्थना गरेको छ।
भाजपा सिक्किमले आज जारी आफ्नो शोक सन्देशमा स्व. लामाले नेपाली साहित्यमा अनगिन्ती मोतीहरू छरेका छन् भने उहाँका कृतिहरू अंग्रेजी, हिन्दी, उर्दु, असमिया र ओडिया भाषामा अनुवाद भई विश्वभर फैलिएको बताएको छ। सानु लामाको निधनले नेपाली साहित्य र गीत–सङ्गीतको एउटा सुवर्ण युग नै अस्ताएको अनुभूति भएको छ।
सिटिजन एक्सन पार्टी, सिक्किमका अध्यक्ष गणेश कुमार राईले एक प्रख्यात नेपाली साहित्यकार एवं पद्मश्रीले सम्मानित सानु लामाको निधनमा गहिरो दु:ख व्यक्त गरेका छन्। उनले आज जारी आफ्नो शोक सन्देशमा हाम्रो भाषा र साहित्यको समृद्धिमा स्व. लामाको विरासत र आजीवन समर्पणको हामी सम्मान गर्दछौं भनेका छन्। सन् 1939 मा जन्मेका सानु लामा एक लेखक मात्र थिएनन्, उनी नेपाली साहित्यका एक स्तम्भ पनि थिए, जसका शब्दहरूले हाम्रो पहिचान, भावना र संघर्षहरूलाई आवाज दिएका थिए भनेका छन्।
