प्रदेश भाजपा अध्यक्षले गृहमन्त्री अमित शाहसँग गरे भेट, सिक्किमसँग सम्बन्धित महत्त्वपूर्ण विषयहरू उठाए

गान्तोक, 02 जुलाई। भारतीय जनता पार्टी (भाजपा) सिक्किमका प्रदेश अध्यक्ष डीआर थापा र प्रदेश महासचिव अर्जुन राईले बुधबार नयाँ दिल्लीमा केन्द्रिय गृहमन्त्री अमित शाहसँग शिष्टाचार भेट गरे। भेटका क्रममा सिक्किमको सुरक्षा, संवैधानिक आकांक्षा, विकास तथा राज्यमा भाजपा संगठनको विस्तारसँग सम्बन्धित विभिन्न महत्त्वपूर्ण विषयमा छलफल गरे। उक्त जानकारी आज प्रदेश भाजपा मिडिया सेलले प्रेस विज्ञप्तिमा दिएको छ।भाजपा सिक्किम अध्यक्ष थापाले हालै गान्तोकमा सार्वजनिक भएको कथित अनलाइन आत्म-कट्टरपन्थ सम्बन्धी घटनाबारे गृहमन्त्रीलाई जानकारी गराए। उनले गृहमन्त्रालयलाई गुप्तचर संयन्त्रबीचको समन्वय, साइबर निगरानी तथा कट्टरपन्थ र राष्ट्रविरोधी गतिविधिविरुद्धको सतर्कता अझ सुदृढ़ बनाउनुपर्ने आवश्यकता औँल्याए। उनले रणनीतिक दृष्टिले अत्यन्त महत्त्वपूर्ण सीमावर्ती राज्यका रूपमा रहेको सिक्किमको शान्ति, सुरक्षा तथा साम्प्रदायिक सद्भावको संरक्षणका लागि प्रभावकारी र सक्रिय सुरक्षा व्यवस्था आवश्यक रहेकोमा जोड दिए।यसैगरी, उनले लिम्बू-तामाङ समुदायका लागि विधानसभामा सीट आरक्षण, छुटेका ११+१ समुदायलाई अनुसूचित जनजातिको मान्यता, कर्मापा र सिक्किमसँग सम्बन्धित अन्य विभिन्न राजनीतिक तथा विकाससम्बन्धी मुद्दाहरूमा पनि ध्यान आकर्षित गराए। उनले निरन्तरको अविरल वर्षाका कारण सिक्किमका विभिन्न क्षेत्रमा भएको व्यापक क्षति, पैह्रो, सडक अवरुद्ध हुनु तथा जनजीवनमा परेको कठिनाइबारे पनि गृहमन्त्रीलाई जानकारी गराए। उनले राहत, पुनःस्थापना, पुनर्वास तथा आपदा प्रतिरोधी पूर्वाधार निर्माणका लागि केन्द्र सरकारबाट थप सहयोगका लागि आग्रह गरे, ताकि राज्यले बारम्बार आउने प्राकृतिक आपदा चुनौतीहरूलाई प्रभावकारी रूपमा सामना गर्न सकोस्।प्रदेश अध्यक्ष थापाले २०२७ पछि पनि विद्यमान उद्योगहरूका लागि बजेटरी सपोर्ट स्किमलाई निरन्तरता दिन अनुरोध गर्दै कर-आधारित औद्योगिक प्रोत्साहन सुविधा समाप्त भएमा उद्योगहरू सिक्किमबाट अन्यत्र सर्न सक्ने र यसबाट हजारौँ सिक्किमेली युवाको रोजगारी प्रभावित हुन सक्ने चिन्ता व्यक्त गरे। उनले सिक्किममा भाजपाप्रति बढ्दो जनसमर्थन तथा संगठनको विस्तारबारे पनि गृहमन्त्रीलाई जानकारी गराए। केन्द्रिय गृहमन्त्री शाहले प्रतिनिधिमण्डलद्वारा उठाइएका सबै विषयलाई गम्भीरतापूर्वक अध्ययन गरिने तथा सिक्किमका जनताको हित, राज्यको सुरक्षा र समग्र विकासलाई ध्यानमा राखी आवश्यक पहल गरिने विश्वास दिएको विज्ञप्तिमा उल्लेख छ।