माई भारत सिक्किमको पॉंच दिवसीय अन्तर-राज्य युवा आदान-प्रदान कार्यक्रम सम्पन्न

गान्तोक, 24 फरवरी । भारत सरकारको युवा मामिला तथा खेलकुद मन्त्रालय अन्तर्गत माई भारत, गान्तोक सिक्किमद्वारा त्रिपुराका युवाहरूका लागि 19 देखि 23 फरवरीसम्म आयोजित अन्तर-राज्य युवा आदान-प्रदान कार्यक्रम समाप्त भएको छ। कार्यक्रमको समापन समारोह तादोङस्थित हार्टफुलनेस सेन्टरमा सम्पन्न भयो।
माई भारत सिक्किम अनुसार, विगत पॉंच दिनमा त्रिपुरा राज्यका युवाहरूले ऐतिहासिक स्थानहरू, अन्तरराष्ट्रिय सीमा, ध्यान कार्यशाला, सांस्कृतिक भ्रमण, अन्तरक्रियात्मक सत्रहरू र सामुदायिक संलग्नता जस्ता गतिविधिहरूमा भाग लिए। कार्यक्रमको उद्देश्य पारस्परिक समझदारीलाई प्रवर्द्धन गर्नु, युवा संवादलाई सुदृढ पार्नु र सहभागीहरूलाई प्रत्यक्ष अन्तर-सांस्कृतिक अनुभवहरू प्रदान गर्नु थियो।
कार्यक्रमलाई सम्बोधन गर्दै राज्यका मुख्य सचिव आर. तेलाङले युवाहरूलाई उद्देश्यपूर्ण जीवनको लागि ध्यान अभ्यास गर्न प्रोत्साहित गरे। यसरी नै माई भारत सिक्किमका उपनिर्देशक मंगल जाखरले युवाहरूलाई सांस्कृतिक जागरूकता, संवेदनशीलता र ज्ञान अभिवृद्धिमा सुसज्जित गर्न यस्ता पहलहरूको महत्त्वमाथि प्रकाश पारे।
गतिविधिहरूमा नथुला पास भ्रमण, आईटीबीपी शिविर भ्रमण र हतियार प्रदर्शनी, सांस्कृतिक प्रदर्शनी, समूह प्रस्तुतीकरणहरू, टोली कार्य र पारस्परिक सम्मानलाई बढावा दिन तयार गरिएका सामाजिक कार्यक्रमहरू समावेश थिए। समापन समारोहमा त्रिपुरा र सिक्किमको समृद्ध सम्पदा र परम्पराको प्रतीकात्मक सांस्कृतिक प्रस्तुतिहरू प्रस्तुत गरिएको थियो। कार्यक्रममा सबै सहभागीहरूलाई स्मारिका र सहभागिताको प्रमाणपत्र प्रदान गरियो।