गान्तोक, २९ अगस्त। राष्ट्रिय खेलकुद दिवसको अवसरमा महान् हक्की खेलाडी मेजर ध्यानचन्दप्रति श्रद्धाञ्जली अर्पण गर्दै सिक्किममा मुख्यमन्त्री ५ किलोमिटर दौड आयोजना गरिएको छ। सत्तारुढ एसकेएम खेलकुद शाखाको आयोजनामा तथा राज्य खेलकुद तथा युवा मामिला विभागको सहकार्यमा आयोजित दौडलाई मुख्यमन्त्री प्रेमसिंह तामाङले झण्डा देखाएर शुभारम्भ गरे।
राजधानीको रिज पार्कबाट शुरू भएको दौडमा लगभग ५०० जनाले उत्साहपूर्वक सहभागिता जनाएका थिए। सहभागीहरूको उल्लेखनीय उपस्थितिले सिक्किममा फिटनेस, खेलभावना र स्वस्थ जीवनशैलीप्रति बढ्दो जागरूकता प्रतिबिम्बित गरेको मुख्यमन्त्रीले बताएका छन्।
उनले कार्यक्रम खेलभावना, शारीरिक तन्दुरुस्ती, अनुशासन तथा स्वस्थ जीवनशैलीको उत्सवका रूपमा आयोजना गरिएको बताए। साथै, मेजर ध्यानचन्दको भारतीय खेलकुदमा रहेको अमूल्य योगदान तथा उनको दीर्घकालीन विरासतलाई सम्मान गरिएको उनले सामाजिक सञ्जाल पोस्टमा उल्लेख गरेका छन्।
कार्यक्रमले सिक्किममा सशक्त खेलकुद संस्कृतिको विकास गर्ने तथा युवालाई फिटनेस, अनुशासन र सक्रिय जीवनशैली अपनाउन प्रेरित गर्ने सामूहिक प्रतिबद्धतालाई समेत पुनः पुष्टि गरेको उनले बताए। उनले खेलभावनाले सिक्किमका युवालाई उत्कृष्टताका लागि निरन्तर प्रयास गर्न प्रेरित गर्दै राज्य र राष्ट्रको गौरव बढाउन योगदान पुर्याउने विश्वास व्यक्त गरेका छन्।
मुख्यमन्त्रीले दौड सफलतापूर्वक सम्पन्न गर्न सहयोग गर्ने आयोजक, स्वयंसेवक, सहभागी तथा यससँग सम्बद्ध सबैप्रति हार्दिक आभार व्यक्त गरेका छन्।
कार्यक्रममा शिक्षा तथा खेलकुद मन्त्री राजु बस्नेत, स्यारीका विधायक तेन्जिङ लाम्था, गान्तोकका विधायक दिले नामग्याल बर्फुङपा, एसकेएम खेलकुद शाखाका सदस्यहरूको उपस्थिति रहेको थियो।
