गान्तोक, 16 मई। सिक्किम राज्यले शुक्रवार आफ्नो स्थापनाको 50औं वर्षगॉंठ हर्षोल्लासको साथमा मनायो। यस अवसरमा दिनभरि विभिन्न कार्यक्रमहरू आयोजन गरियो, जसको शुरूवात बिहान तिरंगा यात्राबाट भयो।
राजधानीको एमजी मार्गबाट निकालिएको तिरंगा यात्रा पाल्जोर स्टेडियममा पुगेर समाप्त भयो। तिरंगा यात्राको अगुवाई मुख्यमन्त्री प्रेमसिंह तामाङले गरेका थिए। यो यात्रा भारतीय सेनाका बहादुर जवानहरूको सम्मान र हालैमा भारतले आतङ्कवाद विरुद्ध चलाएको ‘अपरेशन सिन्दूर’ सफल भएको खुशी मनाउन आयोजन गरिएको थियो।
तिरंगा यात्रामा मन्त्री परिषदका सदस्यहरू, विधायकगण, सरकारका सल्लाहकारगण, राजनीतिक सचिवहरू, विभिन्न विभागका वरिष्ठ अधिकारीहरू, विभिन्न संघ संस्थाका प्रतिनिधिहरू, विद्यार्थीहरू र जनसाधारणको व्यापक सहभागिता थियो। यात्रामा आआफ्नो परम्परागण पोशाकहरू लगाएर सहभागी बनेका थिए भने पाल्जोर स्टेडियममा पुगेपछि तिरंगा यात्रा राज्य दिवस समारोहमा परिणत भयो।
राज्य दिवस समारोहमा सिक्किमका राज्यपाल ओमप्रकाश माथुर मुख्य अतिथि तथा मुख्यमन्त्री प्रेमसिंह तामाङ विशिष्ट अतिथिको रूपमा उपस्थित थिए। यहॉं एसएपी, आईआरबी, सिक्किम पुलिस, होम गार्डहरूले मार्चपास्ट प्रस्तुत गरे भने सिक्किम पुलिसको पाइप एण्ड ब्रास ब्याण्डले आकर्षक प्रस्तुति दिए।
