मुख्यमन्त्रीले नगरपालिका चुनाउका एसकेएम उम्मेदवारहरूसॅंग बैठक गरे

गान्तोक, 24 मार्च। मुख्यमन्त्री तथा एसकेएम पार्टी अध्यक्ष प्रेमसिंह तामाङको अध्यक्षतामा आगामी नगरपालिका चुनाउ 2026 का पार्टी उम्मेदवारहरूलाई लिएर आज एक बैठक आयोजन गरियो। राजधानीको सम्मान भवनमा आयोजित उक्त बैठकमा पार्टीका उम्मेदवारहरूका साथै मन्त्रीगण, विधायकगण र राजनीतिक सचिवहरू उपस्थित थिए।
मुख्यमन्त्री तामाङले आज सामाजिक सञ्जाल फेसबुक पोस्टमा आगामी नगरपालिका चुनाउ 2026 का पार्टी उम्मेदवारहरूलाई लिएर बैठकको अध्यक्षता गरेको जानकारी गराएका छन्। उनले सबै उम्मेदवारहरूलाई हार्दिक बधाई दिँदै उनीहरूको निरन्तर समर्पण र पार्टीप्रतिको बहुमूल्य योगदानले उनीहरूलाई जनताको प्रतिनिधित्व गर्ने यो अवसर प्राप्त भएको बताए। उनले सबैलाई राज्यको कल्याणप्रति नम्रता, निष्ठा र जिम्मेवारीको बलियो भावनाका साथ सामूहिक रूपमा काम गर्न प्रोत्साहित गरे।
मुख्यमन्त्रीले उम्मेदवारहरूलाई पार्टी उनीहरू प्रत्येकको पछाडि दृढ़तापूर्वक उभिएको र उनीहरूको चुनावी यात्रामा हरसम्भव सहयोग प्रदान गर्ने आश्वासन दिए। यसका साथै, उनले उम्मेदवारहरूलाई आफ्नो मनोनयनका औपचारिकताहरू चाँडोभन्दा चाँडो पूरा गर्न आग्रह गर्दै आगामी चुनाउमा उनीहरूको सफलताको लागि शुभकामना व्यक्त गरे।